काठमाडौं । नेकपा एमालेको अवरोधपछि १५ मिनेट स्थगित भएको प्रतिनिधिसभाको दोस्रो बैठक पनि अवरुद्ध भएको छ । एमाले सांसदहरुले उठेर नाराबाजी जारी राखेपछि बैठक कार्यसूचीमा नै प्रवेश गर्न पाएको छैन ।

एमालेले सभामुखले आफ्ना सांसदहरुलाई कारबाही नगरेको र यसको चित्तबुझ्दो जवाफ नदिएको भन्दै संसद अवरुद्ध गरेका हुन्।

एमाले विभाजनमा सभामुखले सहयोगीको भूमिका खेलेको एमालेको आरोप छ । सभामुखले पार्टी फुटाउन भूमिका खेलेको एमालेको आरोपको खण्डन गर्दै सभामुख अग्निप्रसाद सापकोटाले नियमावलीबारे ध्यानाकर्षण गराएका थिए ।

एमालेको नाराबाजी भइरहँदा सभामुख सापकोटाले सभामुखको भूमिकालाई लिएर प्रश्न गर्न नपाइने प्रतिनिधिसभाको नियमावलीको व्यवस्थातर्फ ध्यानाकर्षण गराए ।

सभामुख सापकोटाले प्रमुख प्रतिपक्षी दलको नाराबाजीकाबीच सभामुख तथा उपसभामुखको अनुपस्थितिमा बैठकका अध्यक्षता गर्नका लागि सांसदहरुको नाम मनोनयन गरेको पढेर सुनाएका थिए । जसमा चन्द्रकान्त चौधरी, मानबहादुर विश्वकर्मा, राधाकुमारी ज्ञवाली, रेणुकुमारी यादव, लालबाबु पण्डित, सत्य पहाडी, सरला कुमारी यादव रहेका छन् ।

सभामुख सापकोटाले आफु संविधान, नियम, कानून र ऐन अनुसार अगाडि बढ्न प्रतिवद्ध रहेको र आफूले संविधान, नियम, कानूनको बर्खिलाप केही नगरेको भन्दै पटक पटक बैठक सञ्चालन दिन अनुरोध गरेपनि प्रतिपक्षी दलले निरन्तर नाराबाजी गरेर बैठक सञ्चालन गर्न नदिएका हुन् ।

एमाले सांसदहरुले लागतार नाराबाजी गरेपछि एमाले सांसदहरुको मागबारे आफ्नो ध्यानाकर्षण भएको भन्दै सभामुखले बैठक सञ्चालनका लागि सहयोग गर्न रुलिङ गरे पनि एमाले नाराबाजी र विरोध गरेपछि दोस्रो पटक पनि १५ मिनेटका लागि बैठक स्थगित गरिएको छ ।

यसअघि वैठक शुरु भए लगत्तै एमाले सांसदहरुले अवरोध गरेपछि १५ मिनेटका लागि बैठक स्थगित गरिएको थियो ।