काठमाडौँ । अमेरिकी परियोजना मिलेनियम च्यालेञ्ज् कर्पोरेसन (एमसीसी)को विरोध गर्दै नेकपाका महासचिव नेत्र विक्रम चन्द ‘विप्लव’ प्रदर्शनमा उत्रिएका छन् । एमसीसी खारेज गर्नु पर्ने माग राख्दै उनी प्रदर्शनमा उत्रिएका हुन् ।

सोमबार दिउँसो काठमाडौंस्थित माइतीघरमा भएको प्रदर्शनमा महासचिव विप्लवसहित नेताहरू खड्गबहादुर विश्वकर्मा, हेमन्तप्रकाश वलीलगायत नेताहरु सहभागी थिए ।

नेकपाले गत २३ गते सम्पूर्ण जिल्लाहरू, स्थानीय तह र सहरहरूमा कोणसभा गरेको थियो । यस्तै, २५ गते देशव्यापी विरोध प्रदर्शन, १६ गते एमसीसी सम्झौता कागज सबै जिल्लाहरूमा जलाउने, २७ गते जिल्ला सदरमुकाम र सहरहरूमा सिटी जुलुस र एमसीसी खारेजसम्बन्धि लेखेको बेलुन उडाउने र २८ गते काठमाडौँमा प्रदर्शनसहित सभा गर्ने र सोही सभालाई विप्लवले सम्बोधन गर्ने कार्यक्रम रहेको थियो ।

सडक र विद्युत प्रशारण लाइनसम्बन्धि अमेरिकाले ५ सय मिलियन डलर अनुदान दिन नेपाल सरकारसँग सन् २०१७ मा एमसीसी सम्झौता गरेको थियो । यसका लागि एमसीसीकी उपाध्याक्ष फातिमा सुमार चार दिने भ्रमणका लागि काठमाडौँ आएकी थिइन् ।