काठमाडौं । यो वर्षको बडादशैंका लागि असोज ४ गतेबाट राष्ट्र बैंकले सर्वसाधारणका लागि नयाँ नोट वितरण गर्ने भएको छ ।

गत वर्ष कोरोना महामारीका कारण राष्ट्र बैंकले नयाँ नोट वितरण गरेको थिएन । यसपालि कोरोनाको संक्रमणमा कमी आएर देशैभर निषेधाज्ञा हटाइएसँगै नयाँ नोट वितरण गर्ने निर्णय भएको हो ।

राष्ट्र बैंकले बैंक तथा वित्तीय संस्थाहरुलाई भने नयाँ नोट दिन थालिसकेको छ ।

बैंक तथा वित्तीय संस्थाहरुलाई नोट दिन थालिसकेको र सर्वसाधारणलाई असोज ४ गतेदेखि सटही गर्ने योजनामा रहेको राष्ट्र बैंकका प्रवक्ता देवकुमार ढकालले बताए ।

सर्वसाधारणका लागि बैंकले ५, १०, २०, ५० र १ सय रुपैंयाँ अंकित दरका नयाँ नोट सटही गर्न पाउने छन् ।

प्रवक्त ढकालकाअनुसार एक व्यक्तिले राष्ट्र बैंकबाट १८ हजार ५ सय रुपैयाँसम्म नयाँ नोट पाउने छन् ।