काठमाडौँ । विवादमा रहेको संवैधानिक निकायका पदाधिकारी नियुक्तिमा आफूले दिएको रिटको तत्काल सुनुवाईको माग गर्दै अधिवक्ता ओमप्रकाश अर्यालले पूरक निवेदन दर्ता गराएका छन् । उनले सर्वोच्च अदालतमा पूरक निवेदन दर्ता गराएका हुन् ।

संवैधानिक इजलासमा सुनुवाई तोकिए पनि न्यायाधीश हरि फुयालको एकल इजलासको आदेशपछि रोकिएको थियो । इजलासले प्रधानन्यायाधीशविना संवैधानिक इजलास बस्न नसक्ने आदेश दिएपछि संवैधानिक नियुक्तिविरुद्धको रिटमाथि सुनुवाई रोकिएको हो ।

तत्कालीन प्रधानमन्त्री केपी शर्मा ओलीले ल्याएको अध्यादेशअनुसार बसेको संवैधानिक परिषदको बैठकले विभिन्न संवैधानिक निकायमा गरेको नियुक्ति बदरको माग गर्दै अर्यालले रिट दिएका थिए ।

अध्यादेशअनुसारको संवैधानिक नियुक्तिमा प्रधानन्यायाधीशको समेत संलग्नता रहेको भन्दै इजलासमै प्रश्न उठेपछि सो रिटको सुनुवाई प्रधानन्यायाधीशविना सुनुवाई हुने तय भएको थियो । तर न्यायाधीश फुयालको आदेशपछि सुनुवाई स्थगित छ ।