काठमाडौँ । नेपाली कांग्रेसका नेता रामचन्द्र पौडेल समूहले सभापति शेरबहादुर देउवाको जिल्ला डडेलधुरामा भएको वडा अधिवेशनलाई मान्यता नदिन निर्वाचन समितिसमक्ष माग गरेको छ । भदौ २५ मा जिल्ला कार्य समिति र वडा सभापतिहरूको सहमतिविपरीत सभापति देउवा पक्षले वडा अधिवेशन गरेको भन्दै अधिवेशन स्वीकार्य नहुने नेता पौडेल बताए ।

आज पार्टी केन्द्रीय कार्यालय सानेपामा पत्रकार सम्मेलन गर्दै नेता पौडेलले डडेल्धुरामा फेरि वडा अधिवेशन गरिनुपर्ने बताए । ‘तलबाट पठाइएको क्रियाशील सदस्यको नाममा हेरफेर गरेर केन्द्रबाट नाम पठाइएको छ,’ उनले भने, ‘यस्तो क्रियाकलाप लोकतान्त्रिक पार्टी कांग्रेसमा हुनु गम्भीर हो ।’

सभापतिसमेत रहेका प्रधानमन्त्री देउवाको गृह जिल्ला हो, डडेलधुरा । यहाँ क्रियाशील सदस्यतामा देखिएका विवाद समाधान नगरी वडा अधिवेशनबाट नेतृत्व तथा क्षेत्रीय प्रतिनिधि चयन गरिएको थियो ।

पौडेलले भने, “डडेलधुरामा जसरी अधिवेशन गरियो, हामीले भेटेरभन्दा पनि नमानेर, राज्यसत्ताको प्रयोग गरेर, प्रहरी लगाएर, अप्रजातान्त्रिक तरिकाले निर्वाचन गरियो । त्यो अधिवेशनको सुरुवातमा देखिएको कुलक्षण हो । यसले महाधिवेशन निष्पक्ष हुन्छ भन्नेमा आशंका छ । फेरि चुनाव गराउनुपर्छ । हामीलाई फेक चुनावको मान्य छैन । निर्वाचन समितिले मान्यता दिनुहुँदैन ।