काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङ विद्युत प्रशारण लाइनको निरीक्षणमा निस्किएका छन् ।

देशका विभिन्न ठाउँमा प्रशारण लाइनको अभावमा विद्युत खेर गइरहेको कारण समस्य उत्पन्न भएपछि उनी देशब्यापी निरीक्षणमा निस्किएका हुन् ।

हेटौंडा–भरतपुर–बर्दघाट २२० केभी र बर्दघाट–सर्दी (होङ्सी) १३२ केभी प्रशारण आयोजनामा समस्या देखिएका कारण नवलपरासी पुगेका घिसिङले उक्त आयोजनाको समस्या समाधानबारेमा आइतबार नवलपरासीपूर्व कावासोतीमा सरोकारवालाहरुसँग छलफल गरेका छन् ।

नवलपुरकी प्रमुख जिल्ला अधिकारी मनमायाँ भट्टराई पंगेनीको अध्यक्षतामा भएको छलफलमा बोल्दै प्राधिकारणका कार्यकारी निर्देशक घिसिङले प्रशारणलाइनको अभावमा विद्युत खेर गइरहेको बताए ।

चितवनको भरतपुरबाट पश्चिम १३२ केभी सिङगल सर्किटबाट ९० मेगावाट मात्रै विद्यूत प्रवाह गर्न सकिएको भन्दै घिसिङले निर्माणाधिन २२० केभी प्रशारणलाइन सम्पन्न भएमा ५ सय मेगावाट विद्युत बुटवलसम्म पुर्याउन सकिने स्पष्ट गरे ।

तामाकोशी परियोजनाबाट अहिले २ हजार मेगावाट विद्युत उत्पादन भइरहे पनि ट्रान्समिशन लाइन नहुँदा भरतपुर पश्चिम जान नसकेको उनले बताए ।

एकातिर उद्योगीले बत्ती नपाउने अर्कोतिर खेरगइरहेको अवस्था रहेको भन्दै खपत बढाउन प्रशारणलाइन चाँडै बढाउन आवश्यक रहेको घिसिङले उल्लेख गरे ।

प्रशारणलाइनको अभावले विद्युत खपत बढाउन समस्या भएकै कारण आफूहरु प्रशारण लाइन आयोजनाको निरीक्षणमा निस्किएको उनको भनाइ थियो ।