काठमाडौं । बैंकिङ कसूर मुद्दामा अदालतबाट दोषी ठहर भएका एक अभियुक्तलाई प्रहरीले पक्राउ गरेको छ ।

बाराको जितपुरसिमरा उपमहानगरपालिका–२ घर भई काठमाडौंको बुढानीलकण्ठ बस्ने ६७ वर्षीय कृष्णबहादुर थापालाई महानगरीय अपराध महाशाखाको टोलीले वीरगञ्जबाट पक्राउ गरेको हो ।

जिल्ला प्रहरी कार्यालय पर्सा र बारासँगको समन्वयमा वीरगञ्जको पूर्णिमाचोकबाट पक्राउ गरी काठमाडौं ल्याइएको अपराध महाशाखाले जनाएको छ ।

उच्च अदालत पाटनले थापालाई गत मंसिर २२ गते एक करोड २५ लाख बिगो जरिवाना र १७ दिन कैद सजायको फैसला सुनाएको थियो ।

रबीन्द्र थापाले कृष्णबहादुरविरुद्ध चेक बाउन्सको मुद्दा दिएका थिए । पटक पटकको मुद्दामा विगो तिर्नुपर्नेमा फैसला कार्यान्वयन नगरी फरार रहेको भन्दै अदालतले २०७५ असोज १९ गतेको अर्को फैसलामा थापालाई एक वर्षको कैद सजायको फैसला सुनाएको थियो ।

थापालाई फैसला कार्यान्वयनका लागि काठमाडौं जिल्ला अदालतमा बुझाइएको प्रहरीले जनाएको छ ।