काठमाडौँ । बिपी कोइराला क्यान्सर अस्पताल भरतपुरका तत्कालीन निर्देशक भक्तमान श्रेष्ठको अपहरणमा संलग्न गिरोहका थप एक जना पक्राउ परेका छन् । अपहरणका योजनाकार मध्येका एक राजेन्द्र पण्डित मंगलबार पक्राउ परेका हुन् ।

केन्द्रीय अनुसन्धान ब्युरो (सीआईबी)को टोलीले उनलाई नुवाकोटबाट पक्राउ गरेको हो । अपहरणमा संलग्न भएका उनलाई पुनरावेदन अदालत हेटौंडाले ९ वर्षको कैद र ५० हजार रुपैयाँ जरिमानाको सजाय सुनाइएको थियो ।

तर उनी लुकिछिपी नेपाल र भारतका विभिन्न स्थानमा बस्दै आएका थिए । पछिल्लो समय नुवाकोटमा देखिएपछि प्रहरीले पक्राउ गरेको बताइएको छ । तत्कालीन निर्देशक श्रेष्ठ अस्पतालबाट घर फर्किँदै गर्दा अपहरणकारी रोहित पालिवाल र भीमसेनको समूहले ४ जेठ २०६७ मा अपहरण गरेको थियो ।

फैसला कार्यान्वयनका लागि पण्डितलाई बुधबार नै अदालतमा पेस गरिने जनाइएको छ ।