काठमाडौं । नेपाली कांग्रेस पौडेल पक्षको बैठक बसेको छ । महामन्त्री शंशाक कोइराला निवास महाराजगंज पौडल पक्षको पक्षको बैठक जारी छ ।

दिउँसो १ बजे महामन्त्री शशांक कोइरालाको महाराजगन्जस्थित निवासमा बैठक सुरु भएको पौडेलका सहयोगी चिरञ्जीवी अधिकारीले जानकारी दिए ।

प्रधानमन्त्री एवं कांग्रेस सभापति शेरबहादुर देउवाले पार्टीभित्र छलफलै नगरी नारायण खड्कालाई परराष्ट्रमन्त्री नियुक्त गरेको भन्दै वरिष्ठ नेता रामचन्द्र पौडेलको समूहले असन्तुष्टि व्यक्त गदै आएको छ ।

बैठकमा सहभागी एक नेताले मेरो न्युजसँग भने, ‘सभापति देउवाले पार्टीमा छलफल नै नगरी मन्त्री नियुक्त मनलाग्दी गर्नु भयो,अब कसरी अगाडी बढ्ने विषयमा अहिले बैठक बसेको हो ।’

आजै दिउँसो ३ बजे देउवाले सिंहदरबारस्थित संसदीय दलको कार्यालयमा पदाधिकारी र पूर्वपदाधिकारीको बैठक बोलाएका छन् ।

बैठकमा मन्त्रिपरिषद् विस्तार,पार्टीको १४ औँ महाधिवेशनको तयारी र १३ जिल्लाका क्रियाशील सस्यताको टुंगो लगाउने विषयमा छलफल हुने जनाइएको छ ।

देउवाले प्रधानमन्त्री नियुक्त भएको ७२ दिनपछि बुधबार परराष्ट्रमन्त्रीमा नारायण खड्कालाई नियुक्त गर्न सिफारिस गरेका थिए ।