काठमाडौं । नेपाली कांग्रेसका सभापति शेरबहादुर देउवा नेतृत्वको पाँच दलीय गठबन्धनको सरकार गठन भएको दुई महिना बढी भइसक्दा पनि मन्त्रिपरिषदले पूर्णता पाउन सकेको छैन ।

सत्ता गठबन्धनको एक घटक नेकपा (एकीकृत समाजवादी)को मुद्दा सर्वोच्चमा रहेकै कारण र गठबन्धन दलहरुबीच सहमति नजुट्दा मन्त्रिपरिषद्ले पूर्णता पाउन सकेको छैन ।

लामो समयको रस्साकस्सीपछि बुधबार मात्रै प्रधानमन्त्री देउवाले आफ्नो पार्टीका सांसद डा. नारायण खड्कालाई परराष्ट्रमन्त्री बनाएका छन् । संयुक्त राष्ट्र संघको महासभामा भाग लिन जानुपर्ने भएकाले बुधबार खड्कालाई मन्त्रीको सपथ गराइएको थियो ।

सरकार गठनको लामो समयसम्म पनि मन्त्रिपरिषदले पूर्णता नपाएको भन्दै सर्वत्र आलोचना हुन थालेपछि सत्ता गठबन्धन दलहरु बाक्लो छलफलमा छन् ।

मंगलबार मात्रै डा. खड्कालाई परराष्ट्रमन्त्री बनाउन सहमति जुटाएका गठबन्धन दलहरु बुधबार पनि छलफलमा जुट्ने भएका छन् ।

मन्त्रिपरिषदलाई विस्तार गर्नेबारेमा छलफल गर्न बुधबार साँझ साँझ ५ बजे गठबन्धनमा रहेका दलहरूको बैठक बोलाइएको छ ।

आफ्नो पार्टीबाट सरकारमा पठाउने मन्त्रीको नाम टुंगो लगाउने नेकपा माओवादी केन्द्र पनि आज विहानबाटै आन्तरिक छलफलमा छ ।

सरकारमा पठाउने मन्त्रीको नाम टुंगो लगाउनकै लागि माओवादी स्थायी समिति बैठक पार्टी मुख्यालय पेरिशडाँडामा बसेको छ ।