काठमाडौँ । प्रधानमन्त्री शेरबहादुर देउवाले कोरोना भाइरस कोभिड-१९ महामारी नियन्त्रणमा सबै एकजुट हुनुपर्ने बताएका छन् । अमेरिकी राष्ट्रपति जो बाइडेनले आयोजना गरेको भर्चुअल कोभिड-१९ सम्मेलनलाई बिहीबार राति सम्बोधन गर्दै देउवाले कोभिड-१९ महामारी नियन्त्रणमा सबै एकजुट हुनुपर्ने बताए ।

उनले नेपालले सन् २०२२ अप्रिलसम्म लक्षित समूह (८० प्रतिशत)लाई कोभिड १९ विरुद्धको खोप लगाइसक्ने बताए । राष्ट्रसंघीय महासभाको पूर्वसन्ध्यामा बाइडेनले विश्व नेताहरुलाई आयोजना गरेको सम्मेलनमा नेपालले पनि भाग लिएको हो ।

नेपाललाई महामारीविरुद्ध अमेरिकाले उपलब्ध गराएको खोप र स्वास्थ्य सहायताप्रति प्रधानमन्त्री देउवाले धन्यवाद दिए । सम्मेलनमा भारतीय प्रधानमन्त्री नरेन्द्र मोदीसहितका विश्व नेताहरुले सम्बोधन गरेका थिए । शनिबार राष्ट्रसंघीय महासभाको ७६ औं सत्रलाई १९३ देशका सरकार प्रमुख र राष्ट्र प्रमुखहरुले सम्बोधन गर्दैछन् ।