काठमाडौं । समाचारको विषयलाई लिएर रेडियो नयाँ कर्णाली एफएममा कार्यरत सञ्चारकर्मी ललित विष्टमाथि हातपात भएको भन्दै नेपाल पत्रकार महासंघले ध्यानाकर्षण भएको जनाएको छ ।

रेडियो हाताभित्र भएको हातपात र कालिकोटस्थित गोरखापत्र संवाददाता प्रेमराज सिम्खडालाई ज्यान मार्ने धम्की दिएको घटनाप्रति महासंघले ध्यानाकर्षण गरेको हो ।

सञ्चारकर्मी विष्टमाथि सामाजिक सञ्जाल र अनलाइनमा समाचारको स्रोत खुलाइ प्रकाशित गरेको भन्दै कालिकोट जिल्लास्थित शुभकालिका गाउँपालिका उपाध्यक्ष पम्फाकुमारी शाहीले कार्यालय हाताभित्रै हातापात गरेको महासंघले जनाएको छ ।

साथै विष्टलाई पम्फाका श्रीमान् बखत शाहीले सिम्खडालाई ज्यान मार्ने धम्की दिएको पत्रकार महासंघ कालिकोट शाखाले जनाएको छ ।

कुनै पनि बहानामा स्थानीय निकायमा आसिन रहेका जिम्मेवार व्यक्ति र उनका श्रीमानबाट पत्रकारमाथि भएको घटना प्रेस विरोधी भएको पत्रकार महासंघका महासचिव रोशन पुरीले सोमवार जारी गरेको विज्ञप्तिमा उल्लेख छ ।

घटनाको छानबिन गरी दोषीमाथि कानुनी कारबाही गर्न पनि महासंघले स्थानीय प्रशासनको ध्यानाकर्षण गराएको छ ।

यस्तै, समाचार संकलनका क्रममा भाद्र १० गते महासंघ काठमाडौं शाखाका सदस्य यज्ञ ढकालमाथि काठमाडौं उपत्यका खानेपानी लिमिटेड महाकालचौरका खरिद प्रमुखसहितका कर्मचारीबाट भएको हातपातको घटना भएकोमा पनि महासंघले ध्यानाकर्षण गराएको छ ।