काठमाडौं । अस्वस्थ प्रतिस्पर्धामा उत्रिएर निक्षेपको ब्याजदर बढाउने बैंक तथा वित्तीय संस्थालाई राष्ट्र बैंकले घटाउनका लागि निर्देशन दिएको छ ।

राष्ट्र बैंकले बैंक तथा वित्त कम्पनीका छाता संगठन नेपाल बैंकर्स एशोसियशनलाई निक्षेपको ब्याजदर बढाउनेहरुलाई नियम पालना गरि तत्कालै घटाउन निर्देशन दिएको हो ।

यो साता नियम पालना नगरे कारबाही गर्ने चेतावनी समेत दिएको नेपाल राष्ट्र बैंकका कायममुकायम कार्यकारी निर्देशक दयाराम शर्माले जानकारी दिए ।

बैंकिङ प्रणालीमा लगानीयोग्य रकम संकुचित भएकाले बैंक तथा वित्त संस्थान गत असोज १ गतेदेखि लागू हुने गरी निक्षेपको ब्याजदर बढाउन थालेका छन् ।

यसअघि केन्द्रीय बैंकले निर्देशन जारी गर्दै बैंक तथा वित्त कम्पनीले बचत र मुद्दति निक्षेपको ब्याजदरमा ५ प्रतिशतको अन्तर कायम गर्नुपर्ने सूचना जारी गरेको थियो ।

यद्यपी बैंक तथा वित्तीय संस्थाले असोज यसअघि सार्वजनिक गरेको ब्याजदर एक महिना नपुग्दै पुनरावलोकन भन्दै नयाँ ब्याजदर घोषणा गरेपछि केन्द्रीय बैंकले चेतवनी दिएको राष्ट्र बैंकका कायममुकायम कार्यकारी निर्देशक शर्माले बताए ।

मुक्तिनाथ विकास बैंक र सांग्रिला विकास बैंकले यसअघि नै सार्वजनिक निक्षेपको ब्याजदरमा ०.५ प्रतिशत थप गरी प्रेश विज्ञाप्तीमार्फत् ब्याजदर घोषणा गरेको थियो । सोही ०.५ प्रतिशत ब्याजदर घटाउन राष्ट्र बैंकले निर्देशन दिएको थियो ।

साथै, नयाँ ब्याजदर सार्वजनिक गरेपनि अन्य बैंकहरुसँग प्रतिस्पर्धा गर्दै पुनः नयाँ ब्याजदर घोषणा गरेका सिभिल बैंक र सेञ्चुरी बैंकलाई राष्ट्र बैंकले एकल एकल रुपमा निर्देशन दिएपनि मापन प्रयोग नगरेका कारण नेपाल बैंकर्स एशोसियशनलाई बोलाएर निर्देशन दिएको र नियम पालनाका लागि अघि बढ्ने नेपाल बैंकर्स संघका अध्यक्ष भुवन दाहालले मेरोन्यूजलाई जानकारी दिए ।

यद्यपी दाहालले सेवाशुल्कमा राष्ट्र बैंकले गरेको कडाइमा पुर्नविचार गर्न आग्रह गरेपनि अटेर गरेकाले कारबाहीबाट बच्नुको विकल्प नभएको बताए ।