काठमाडौँ । गत सोमबार बिहान विराटनगर विमानस्थलमा अवतरण गर्न नसकेर काठमाडौँ फर्किएर दुई घण्टापछि सफल अवतरण गरेको बुद्ध एयरको ९–एनएएनआई एटिआर जहाजका पाइलटलाई ७२ घण्टा उडान भर्न रोक लगाइएको छ । पाइलट आङ्गेलु शेर्पालाई नेपाल नागरिक उडड्यन प्राधिकरणले ७२ घण्टा उडान भर्न रोक लगाएको हो ।

पाइलट शेर्पाले उडाएको जहाजले भने प्राविधिक जाँच गरेसँगै मंगलदेखि उडान भर्न सुरु गरेको छ । जहाज दुर्घटनाको नजिक पुगेर
सफल अवतरण गर्न सफल भएका पाइलटलाई हुन सक्ने मानसिक तनावको ख्याल गर्दै ७२ घण्टा बिदामा बस्न भनिएको प्राधिकरणले जनाएको छ ।

पाइलट शेर्पाको उडान क्षमतामा प्राधिकरण र बुद्ध एयरले कुनै कमजोरी नदेखिएको जनाएको छ । अन्तर्राष्टिय नागरिक उडड्यन संगठन (आइकाओ)को मापदण्डअनुसार उनलाई उडान भर्न नदिइएको हो ।

जहाजको ल्याण्डिङ गेयर डाउन नभएको र थ्रि ग्रिन सिग्नलले संकेत नगरेपछि पाइलटले उच्च सतर्कताका साथ त्रिभुवन अन्तर्राष्ट्रिय विमानस्थतमा अवतरण गराउने तयारी गरेका थिए । तर, जहाजको ल्याण्डिङ गेयर खुलेसँगै सफल अवतरण भएको थियो ।