काठमाडौँ । नेकपा एमालेका अध्यक्ष केपी शर्मा ओलीलाई सातदोबाटोदेखि गोदावरीसम्म सयौँ गाडी तथा मोटरसाइकलले स्कर्टिङ गर्ने भएको छ । आजदेखि सुरु हुन लागेको पार्टीको विधान महाधिवेशनमा सहभागी हुन जाँदा उनलाई स्कर्टिङ गर्ने भएको हो ।

यसअघि गत असार ३० गते प्रधानमन्त्रीको पदबाट हटेसँगै ओलीलाई बालुवाटारदेखि ओली निवास बालकोटसम्म मोटरसाइकलले स्कर्टिङ गरी लगिएको थियो । पार्टीको प्रथम विधान महाधिवेशनको उद्घाटन गर्ने भएका ओलीलाई सोहीअनुरुप आज पनि स्कर्टिङ गरी महाधिवेशन स्थलसम्म लैजाने भएको एक नेताले जानकारी दिए ।

ओलीले आज मध्यान्ह १२ बजे ललितपुरको गोदावरीस्थित सनराइज सभाहलमा विधान महाधिवेशनको उद्घाटन गर्ने कार्यक्रम रहेको छ । महाधिवेशन आगामी आइतरबासम्म चल्ने भएको छ ।

महाधिवेशनमा देशभरबाट पाँच हजारभन्दा बढी प्रतिनिधिहरू सहभागी हुने भएका छन् । यस विधान महाधिवेशनमा राजनीतिक प्रतिवेदन, विधान संशोधन प्रस्ताव, संगठनात्मक प्रतिवेदनलगायतका विषयमा छलफल हुने भएको छ ।