काठमाडौँ । नेपाली कांग्रेसको १४ औँ महाधिवेशनको संघारमा छ । देशभरका वडा अधिवेशन सकिएका जिल्लाहरूमा धमाधम पालिका अधिवेशन भइरहेको छ ।

यसै क्रममा काठमाडौँ महानगरपालिकासहित ७ वटा नगरपालिकामा शनिबार नै अधिवेशन सम्पन्न भइसकेको छ । यी ७ नगरपालिकामध्ये ४ वटामा नेता प्रकाशमान सिंह समूहको नेतृत्व निवार्चित भएका छन् । अधिवेशन हुन बाँकी ३ मध्ये चन्द्रागिरी र र्कीतिपुरमा भोलिसम्ममा टुंगो लाग्ने कांग्रेसका एक नेताले जानकारी दिए । ती नेताका अनुसार यी दुवै नगरपालिकामा सिंह समूह नै बलियो देखिएको छ भने दक्षिणकाली नगरपालिकाको एउटा वडामा अधिवेशन नहुँदा नगर अधिवेशनमा अन्योल देखिएको छ ।

महानगरमा कुन समूह अगाडि ?

काठमाडौँ महानगर सबैभन्दा बढी क्रियाशील सदस्य रहेको महानगरमा हो । अहिले उक्त महानगपालिकाको अधिवेशन अन्तर्गतको मतदान सकिएको छ भने मत गणना जारी छ ।

साँझ ६ बजेसम्म भएको ३ सय मत गणना हुँदा २१४ नीलकाजी शाक्यको पक्षमा रहेका छ भने उनेका विपक्षी प्रगतिमान रञ्जितको पक्षमा ७७ मत खसेको निर्वाचन समितिले जनाएको छ ।

काठमाडौँ महानगरमा संस्थापनतर्फ पूर्व उपसभापति प्रकाशमान सिंह र गगन थापाको गठबन्धनबाट संस्थापनइतर समूहबाट निलकाजी शाक्य उम्मेदवार बनेका छन् । संस्थापन समूह प्रगतिमान रञ्जित उम्मेदवार छन् । उनलाई देउवा समूहले कांग्रेसको तेस्रो धार कृष्ण प्रसाद सिटौला निकट भीमसेनदास प्रधानको साथका लागि गठबन्धन गरेको थियो ।

गोकर्णेश्वरमा नगरपालिका

गोकर्णेश्वर नगरपालिकामा संस्थापनइतर समूहका कुमार लामा विजयी भएका छन् । उनी पूर्व उसभापति प्रकाशमान सिंह निकट हुन् ।

उनी १०९ मत ल्याएर विजयी भएका हुन् भने संस्थापन पक्षबाट मैदानमा उत्रिएका रामजी श्रेष्ठले ९३ मत ल्याएका थिए । उनी भिमसेनदास प्रधान निकट हुन् ।

कागेश्वरी–मनहरा नगरपालिका

कागेश्वरी–मनहरा नगरपालिकामा संस्थापन पक्षका उम्मेदवार उद्धव दाहाल निर्वाचित भएका छन् । संस्थापनइतर समूहबाट मैदानमा उत्रिएका मिठ्ठाराम दाहालले १३८ मत ल्याए । उनी सिंह निकट हुन् भने संस्थापन पक्षका विजय दाहालले १५१ मत ल्याए । उनलाई काठमाडौँ कांग्रेसका पूर्व सभापति रहेका प्रधान समूहले पनि सघाएको थियो ।

बुढानीलकण्ठ नगरपालिका

बुढानीलकण्ठ नगरपालिकामा संस्थापनइतर समूहबाट मैदानमा होमिएका राजाराम बुढाथोकी १५५ मत ल्याउँदै निर्वाचित बनेका छन् । उनी नेता गगन थापा निकट हुन् । उनी थापा र सिंहको गठबन्धबाट निवार्चित भएका हुन् । संस्थापन पक्षबाट मैदानमा आएका राजुविक्रम थापाले ४८ मत पाएर पराजित भए ।

टोखामा नगरपालिका

टोखा नगरपालिकामा संस्थापन समूह अर्थात प्रधान समूहबाट मैदान उत्रिएका ओमकृष्ण विमलीले ११७ मत ल्याएर नगर सभापति बनेका छन् । संस्थापनइतर समूहबाट दीपक जोशी मैदानमा उत्रिएका थिए । उनले १०६ मत मात्र प्राप्त गरे । उनी कांग्रेस पूर्व उपसभापति सिंह निकट मानिन्छन् ।

शंखरापुर नगरपालिका

शंखरापुर नगरपालिकाको नेतृत्वमा भने सिंह समूहबाट उम्मेदवार बनेका दिलीपकुमार श्रेष्ठ निर्वाचित भएका छन् । उनले संस्थापन र प्रधान समूहबाट संयुक्त उम्मेदवार बनेका सत्यमान लामालाई पराजित गरेका हुन् ।

तारकेश्वर नगरपालिका

तारकेश्वर नगर सभापतिमा नेता प्रधान निकट कृष्णहरि महर्जन विजयी भएका छन् । उनी १३५ मत ल्याएर विजयी बनेका हुन् । सिंह समूहबाट मैदानमा उत्रिएका श्रीराम थापाले ११४ मत ल्याई पराजित भए । सोही नगरपालिकामा सभापतिका अर्का उम्मेदवार मुकुन्द तिमिल्सिनाले भने दुई मत मात्रै ल्याए ।

नागार्जुन नगरपालिका

नागार्जुन नगरपालिकाको सभापतिमा दुर्गाप्रसाद गौतम विजयी भएका छन् । उनी पूर्व महामन्त्री सिंह निकट हुन् । उनीसँगै सिंह समूहमा नै रहेका अच्युत पाण्डे मैदानमा उत्रिएका थिए । उनी पराजित बने ।