काठमाडौँ । प्रधानमन्त्री शेरबहादुर देउवाले चैतभित्र सबै नेपालीलाई कोरोना भाइरस कोभिड १९विरूद्ध खोप लगाइसक्नुपर्ने बताएका छन् । बिहीबार बसेको कोभिड-१९ संकट व्यवस्थापन केन्द्रको पहिलो बैठकमा प्रधानमन्त्री देउवाले खोप खरिद गरेर भए पनि चैतभित्र सबैलाई पूर्ण मात्रामा लगाइसक्नुपर्ने बताए ।

देउवाले कोरोना खोपको अभाव हुन नदिन निर्देशन दिएका छन् । उनले भने, ‘कोरोना खोपको कमी नहोस्, चैतभित्र सबै नेपालीलाई खोप लगाइसक्नुपर्छ । सबैलाई निस्शुल्क खोप लगाउने हो ।’ देउवाले दाताबाट सहयोग मागेर भए पनि खोप ल्याउनु पर्ने बताए । नेपालमा अहिलेसम्म कूल जनसंख्याको ३४ प्रतिशतले पहिलो मात्रामा खोप लगाइसकेका छन् भने दोस्रो मात्राको खोप २२ प्रतिशतले लगाएका छन् ।

यस्तै बैठकमा कोरोना भाइरसको अहिलेसम्मको अवस्थाको समिक्षा गरिएको थियो । नेपाल र अन्तराष्ट्रिय स्तरमा कोरोनाको अवस्था, नेपालमा मौजदात खोप, आउन बाँकी रहेको खोपको बारेमा बैठकमा समिक्षा गरिएको जनाइएको छ ।