काठमाडौं । नयाँ व्यवसायको पूँजी अब राष्ट्रिय वाणिज्य बैंकले दिने भएको छ । राष्ट्रिय योजना आयोग र अर्थ मन्त्रालयले नयाँ व्यवसायका लागि २ वर्षअघि देखि नै दिने भनेपनि अहिलेसम्म लागु गरेको थिएन ।
आर्थिक वर्ष २०७६/0७७ देखि नयाँ व्यवसाय सञ्चालनको लागि अनुदान उपलब्ध गराउने गरी सरकारले यो कार्यक्रम ल्याएको थियो ।

सोहि बमोजिम राष्ट्रिय योजना आयोगले अनुदान सम्बन्धी कार्यविधि बनाएर आवेदन समेत संकलन गरेको थियो । त्यसबेला ६९९ जनाले निवेदन दिएका थिए ।

अर्थमन्त्री जनार्दन शर्माले चालु आर्थिक वर्ष २०७८÷०७९ को बजेटमार्फत १ अर्ब रुपैयाँ विनियोजन गरेर नयाँ व्यवसायलाई ऋण दिने बताएका थिए । उनले बजेटमा १ प्रतिशत ब्याजमा नयाँ व्यवसायीलाई ऋण उपलब्ध गराउने बताएका थिए ।
अर्थमन्त्री शर्माले दुर्गम बस्तीका युवाहरुले समेत सजिलै नयाँ व्यवसाय ऋण पाउने गरि गरी कार्यविधि बनाउन निर्देशन दिइसकेका छन् ।

नयाँ व्यवसाय सञ्चालन गर्दा यसअघि परेका आवेदनको सम्बोधन हुने गरी कार्यविधि बनाउने तयारीमा अर्थमन्त्रालय लागेको छ ।

सम्बन्धित क्षेत्रका व्यक्तिसँग नयाँ व्यवसायबारे छलफल भएर कार्यविधी बनाउने तयारी भइरहेको अर्थमन्त्रालयका प्रवक्ता रितेश शाक्यले जानकारी दिए ।

चालू आर्थिक वर्षको अन्त्यसम्मा नयाँ व्यवसायलाई दिने ऋण कार्यान्वयन हुने भएकाले सबै जिम्मा राष्ट्रिय वाणिज्य बैंकलाई दिइने उनले बताए ।

वाणिज्य बैंकले नै नयाँ व्यवसायका लागि ऋण दिनेबारे छलफल भएकाले नियमानुसार लागु हुने वाणिज्य बैंकले जनाएको छ ।

नयाँ व्यवसायको सिद्धान्त र अन्तर्राष्ट्रिय अभ्यासलाई मध्येनजर गर्दै कार्यविधिलाई टेकेर ऋण उपलब्ध गराउन वाणिज्य बैंक पर्खाईमा बसेको छ ।