काठमाडौँ । नागरिक अभियान्ता डा. गोविन्द केसीले संयुक्त राष्ट्रसंघीय जलवायुसम्बन्धी बैठक सीओपी ट्वेन्टी सिक्समा नेपालजस्ता कार्बन उत्सर्जन कम गर्ने देशको विशेष भुमिका हुने बताएका छन् । शुक्रबार प्रेस विज्ञप्ति जारी गर्दै डा केसीले नेपालजस्ता कार्बन उत्सर्जन कम गर्ने तर जलवायु संकटको जोखिम उच्च भएका देशहरुले विशेष भुमिका खेल्नु पर्ने बताए ।

उनले संयुक्त राष्ट्रसंघको महासभामा कार्बन उत्सर्जन कम गर्ने, द्वन्द्वको अन्त, सबैलाई कोभिड भ्याक्सिनको पहुँचलगायत शिक्षा र स्वास्थ्य क्षेत्रका एजेण्डाहरुसमेत राखेर राष्ट्रसंघको मुख्यालय अगाडि आफूहरुले प्रदर्शन गरेका पनि बताए । अधिक कार्बन उत्सर्जन गर्ने देशहरुलाई जवाफदेही बनाउन नेपालजस्ता देशले चुस्त कुटनीति अँगाल्नु पर्ने उनले बताए ।

कार्बन उत्सर्जन कम गर्न उनले सरकारसँग चार माग राखेका छन् । उनका मागमा शहरी पूर्वाधारलाई वातावरणमैत्री बनाउनु पर्ने, देशको वन क्षेत्रको संरक्षण र बिस्तार गर्नुपर्ने, एकपल्ट प्रयोग हुने प्लास्टिकको झोला पूर्ण रुपमा निषेध गर्नुपर्ने र वायु प्रदुषण कम गर्न फोहर जलाउन पूर्ण रुपमा निषेध गर्ने तथा जन चेतना फैलाउनु पर्ने रहेका छन् ।

बेलायतको शहर ग्लासगोमा हुन लागेको जलवायु परिवर्तनसम्बन्धी सम्मेलन (कोप–२६) मा भाग लिन प्रधानमन्त्री शेर बहादुर देउवा आज त्यसतर्फ जाँदैछन् । यस्तै केसीले स्वास्थ्य र मेडिकल शिक्षा सुधारका लागि गरेका सम्झौता तथा प्रतिबद्धताहरु कार्यान्वयन गर्न सरकारको ध्यानाकर्षण गराएका छन् ।