अमेरिकासँग पछिल्लोे समय तनाव बढ्दै जाँदा इरानी विदेश मन्त्री अब्बास अराघची रुसी अधिकारीहरू र राष्ट्रपति भ्लादिमिर पुटिनसँग वार्ता गर्न मस्को र सेन्ट पिटर्सबर्ग प्रस्थान गरेका छन्।

रुस दशकौंदेखि इरानको रणनीतिक सहयोगी रहँदै आएको छ । सोही कारण यो भ्रमणलाई निकै महत्वपूर्ण रुपमा हेरिएको छ ।

अमेरिकासँगको युद्ध अन्त्य गर्न तेहरानले आफ्नो कूटनीतिक प्रयासलाई तीव्र बनाएको छ। आइतबार ओमानको भ्रमण गरेका अराघचीले मस्कटमा भएको वार्ता हर्मुज जलडमरूमध्यमा ‘सबै छिमेकीहरूको हित हुने गरी सुरक्षित पारवहन सुनिश्चित गर्ने उपायहरूमा’केन्द्रित रहेको बताएका छन्।

इरानको समाचार एजेन्सी इर्नाका अनुसार, विदेशमन्त्री अब्बास अराघचीले सेन्ट पिटर्सबर्गमा सोमबार रुसी राष्ट्रपति भ्लादिमिर पुटिनसँग भेटघाट गर्ने कार्यक्रम रहेको छ।मस्कोका लागि इरानी राजदूतलाई उद्धृत गर्दै समाचार एजेन्सीले यस बैठकको विवरण सार्वजनिक गरेको हो।

उक्त छलफलमा रुसी विदेशमन्त्री सेर्गेई लाभरोभ पनि सहभागी हुनेछन्। बैठक मुख्यतया इरान विरुद्धको अमेरिका-इजरायल युद्ध अन्त्यका लागि भइरहेका वार्ताहरूको वर्तमान अवस्थामा केन्द्रित रहने बताइएको छ ।

इरानी अधिकारीहरूद्वारा विगत २४ घण्टामा गरिएका गतिविधिहरूमध्ये अराघचीको भ्रमण सबैभन्दा महत्त्वपूर्ण घटना हो । यो इरानले यस क्षेत्रमा अगाडि बढाइरहेको एउटा वृहत् कूटनीतिक पहलको हिस्सा जस्तो देखिन्छ, जसको सुरुवात इस्लामाबादबाट मस्कट र पुनः इस्लामाबादसम्म फैलिएको छ।

यसको व्यापक सन्देश यो हो कि इरान यस क्षेत्रमा आफ्नो उपस्थिति सुदृढ गर्न र क्षेत्रीय साझेदारहरूबीच समन्वय कायम गर्न केन्द्रित छ। यस भ्रमणको एउटा मुख्य केन्द्रविन्दु हर्मुज जलडमरू पनि हो। इरानीहरूले संयुक्त राज्य अमेरिकाको नौसेनाद्वारा गरिएको ‘नाकाबन्दी’लाई निरन्तर अस्वीकार गर्दै आएका छन्।

रुस भ्रमणपछि इरानी विदेशमन्त्री पुनः पाकिस्तान भ्रमण गर्ने तयारी रहेको बताइएको छ ।

इरानी विदेशमन्त्री पुनः पाकिस्तान आउने तयारी