कैलाली । धनगढीमा स्रोत नखुलेको पौने ९ लाख नगदसहित ३ जना पक्राउ परेका छन् । बझाङको मष्टा गाउपालिका १ कोटदेबल बस्ने २२ वर्षीय मुकेश खड्का, १८ वर्षीय किरण खड्का र २४ वर्षीय नारायण खड्कालाई प्रहरीले पक्राउ गरेको हो ।

उनीहरुको साथबाट ८ लाख ६९ हजार नेपाली रुपैयाँ र तीन हजार दुई सय भारतीय रकम बरामद गरिएको जिल्ला प्रहरी कार्यालय कैलालीका प्रहरी नायब उपरीक्षक प्रतीक बिष्टले जानकारी दिए । ‘गोप्य सूचनाको आधारमा सुदूरपश्चिम प्रदेश प्रहरी कार्यालय र जिल्ला प्रहरी कार्यालयबाट खटिएको प्रहरी टोलीले उनीहरुलाई धनगढी उपमहानगरपालिका ४ स्थित होटल अमन प्लाजाबाट पक्राउ गरेको हो,’ बिष्टले भने ।

जाँच गर्दा उनीहरुको साथबाट स्रोत नखुलेको रकमसहित सुन जस्तो देखिने ३४.३६० ग्राम गरगहना र ७३७.८७ ग्राम चाँदी जस्तो धातुका विभिन्न गहना र समान बरामद गरिएको बिष्टले बताए । उनीहरुलाई आवश्यक कारबाहीका लागि राजश्व अनुसन्धान कार्यालय कोहलपुर बाँके पठाएको छ ।