काठमाण्डौँ । अब कुनै पनि कम्पनीको आईपीओ बाँडफाँड भएको एक घन्टाभित्रै अन्तिम नतिजा हेर्न सकिने भएको छ ।

सीडीएससीका प्रवक्ता सुरेश न्यौपानेले प्रणालीमा सुधार गर्दै अब कुनै पनि कम्पनीको आईपीओ बाँडफाँड भएको एक घन्टाभित्रै अन्तिम नतिजा सार्वजनिक गर्न थालिएको जानकारी दिए ।

उनले भने ‘आजको सामलिङ्ग पावर कम्पनीको आईपीओको नतिजा पनि बाँडफाँड भएको एक घन्टाभित्रै सार्वजनिक गर्न सफल भएका छौँ’, । प्रवक्ता न्यौपानेले यसअघिको मध्य भोटेकोशी जलविद्युतको आईपीओ पनि एक घन्टाभित्रै सार्वजनिक गरिएको दाबी गरे ।

अब आईपीओको अन्तिम नतिजा धितोपत्र बिक्री प्रबन्धकका रुपमा रहने क्यापिटलहरुले समयमै सीडीएससीलाई डाटा उपलब्ध गराएको खण्डमा एक घन्टाभित्रै लगानीकर्ताहरुले हेर्न पाउने उनले बताए ।

प्रवक्ता न्यौपानेले सीडीएससीको सिस्टम स्तरोन्नति गरिएपछि मेरो सेयरमा लामो समयदेखि खासै समस्या नदेखिएको उल्लेख गरे । पछिल्लो समय सीडीएससीले आफ्नो प्रणालीलाई स्तरोन्नति गर्दै लगेको छ । केही सयमअघि सीडीएससीले आईपीओको रिजल्ट हेर्न छुट्टै व्यवस्था गरिसकेको छ ।