विराटनगर । प्रदेश १ का नवनियुक्त मुख्यमन्त्री राजेन्द्र राईले ६ सदस्यीय मन्त्रिपरिषद् गठन गरेका छन् ।
राईले मुख्यमन्त्रीको शपथ लिए लगत्तै सानो आकारको मन्त्रि मण्डाल गठन गरिएको हो । मुख्यमन्त्री राईलाई प्रदेश प्रमुख सोमनाथ अधिकारी प्यासीले मंगलबार दिउसो पद तथा गोपनीयताको शपथ दिलाएका थिए ।

राईको सपथपछि प्रदेश प्रमुख सोमनाथ अधिकारीले चार मन्त्रीलाई शपथ गराएका हुन् । मुख्यमन्त्री राईले राज्यमन्त्रीलाई सपथ गराएका थिए ।

गठबन्धनका तर्फबाट काँग्रेसबाट २ जना, माओवादी केन्द्रबाट १ जना, जसपाबाट १ जना मन्त्री र संयुक्त लोकतान्त्रिक राष्ट्रिय मञ्चवाट १ जना राज्यमन्त्रीसहित मुख्यमन्त्री राईले शपथ लिएका छन् ।

काँग्रेसबाट केदार कार्की आन्तरिक मामिला तथा कानुनमन्त्री र हिमाल कार्की भौतिक पूर्वाधार मन्त्री, माओवादी केन्द्रबाट इन्द्रबहादुर आङ्बो आर्थिक मामिला तथा योजनामन्त्री र जसपाबाट जयराम यादव सामाजिक विकास मन्त्री नियुक्त भएका छन् ।

यस्तै, संयुक्त लोकतान्त्रिक राष्ट्रिय मञ्चकी विष्णुमाया तुम्बाहाङ्फे सामाजिक विकास राज्यमन्त्री नियुक्त भएकी छन् ।

नेकपा (एकीकृत समाजवादी) का प्रदेश १ का संसदीय दलका नेता राई मंगलबार नै मुख्यमन्त्रीमा नियुक्त भएका हुन् । राईलाई प्रदेश प्रमुख प्यासीले आजै मंगलबार मात्र नेपालको संविधानको धारा १६८ को उपधारा (२) अनुसार मुख्यमन्त्रीमा नियुक्त गरेका थिए ।

प्रदेश १ मा भीम आचार्यले मुख्यमन्त्री पदवाट दिएको राजीनामा प्रदेश प्रमुख सोमनाथ अधिकारी प्यासीले स्वीकृत गरी मुख्यमन्त्री पदमा दावी पेश गर्न मंगलबार दिउँसो १ बजेसम्म आह्वान गरेका थिए । राईले भने सोमवार नै मुख्यमन्त्री पदमा दाबी पेश गरेका थिए ।