सुर्खेत । कर्णाली प्रदेशका मुख्यमन्त्रीबाट महेन्द्रबहादुर शाहीले सोमवार राजीनामा दिएका थिए । प्रदेश १ का मुख्यमन्त्री भीम आचार्यले पदबाट राजीनामा दिएकै दिन कर्णाली प्रदेशका मुख्यमन्त्री शाहीले पनि राजीनामाको घोषणा गरेका थिए ।

तर दुवैको राजीनामा एउटै कारणले भने थिएन । प्रदेश १ बाट आचार्यले आफू अल्पमतमा परेर विश्वासको मत पाउन नसक्ने भएपछि राजीनामा दिएका थिए भने महेन्द्र शाहीले गठबन्धनको आलोपालो नेतृत्व लिने पूर्व सहमतिअनुसार पद त्यागेका थिए ।

२०७४ फागुन ३ गते मुख्यमन्त्री नियुक्त भएका महेन्द्र शाहीले गत वैशाख ३ गते विश्वासको मत लिने क्रममा सत्ता सहकार्यका लागि कांग्रेससँग सौदावाजी गरेका थिए ।

प्रदेश १ बाट आचार्यको राजीनामापछि मंगलबार नै पाँच दलीय गठबन्धनबाटै माधव नेपाल नेतृत्वको नेकपा (एकीकृत समाजवादी)का नेता राजेन्द्रकुमार राई मुख्यमन्त्री भए । मुख्यमन्त्री भए लगत्तै उनले मंगलबार नै ६ सदस्यीय मन्त्रिपरिषद् गठन गरेका छन् ।

यता, कर्णाली प्रदेशमा भने त्यही पाँच दलीय गठबन्धनबाटै नेपाली कांग्रेसका सांसद जीवनबहादुर शाही मुख्यमन्त्री बनेका छन् ।

कर्णालीका प्रदेश प्रमुख गोविन्दप्रसाद कलौनीले महेन्द्रबहादुरको राजीनामापछि मुख्यमन्त्री पदमा नियुक्तिका लागि दाबी पेश गर्न प्रदेशसभा सदस्यलाई २४ घण्टाको समयसीमा दिएका थिए ।

गठबन्धनको पूर्ववत सहमतिअनुसार नै कांग्रेसका जीवनबहादुर शाहीले मुख्यमन्त्रीमा दाबी पेश गरे ।

३५ जना प्रदेशसभा सदस्य रहेको कर्णाली प्रदेशमा उनले माओवादी केन्द्रबाट १२ जना, कांग्रेसबाट ६ जना, एकीकृत समाजवादीबाट ३ जना गरेर २१ सांसदको हस्ताक्षरसहित मुख्यमन्त्रीको दाबी पेश गरेका थिए ।

कर्णालीमा कांग्रेसका प्रभावशाली नेताको रुपमा चिनिने शाही पछिल्लो पटक हुम्लाबाट सांसद् बनेका थिए । शाही कर्णाली प्रदेशसभामा कांग्रेसको तर्फबाट एक मात्र प्रत्यक्ष निर्वाचित सांसद् हुन् ।

शाही यसअघि २०७३ सालमा शेरबहादुर देउवा नेतृत्वको सरकारमा संस्कृति, पर्यटन तथा नागरिक उड्डयनमन्त्री बनेका थिए ।