काठमाडौं । नेकपा (एमाले)को विभाजनपछि एकता राष्ट्रिय अभियान चलाएका नेता बामदेव गौतमले अमेरिकी सहयोग परियोजना (एमसीसी) फिर्ता लैजान सुझाव दिएका छन् ।

राष्ट्रिय सभा सदस्यसमेत रहेका गौतमले बुधबार विज्ञप्ति जारी गर्दै एमसीसी परिजनाका कारण नेपाली जनतामा मतभेद बढेको भन्दै परियोजना फिर्ता लैजान आग्रह गरेका हुन् ।

गौतमले एमसिसी परियोजनाले नेपालको हितभन्दा पनि जनमतको विभाजनका कारण गम्भीर अहित हुने अवस्था सिर्जना हुने देखिएको उल्लेख गरेका छन् ।

एकपक्षीय रुपमा भए पनि एमसीसी परियोजना फिर्ता लैजान नेता गौतमले अमेरिकी सरकारलाई सोही विज्ञप्तिमार्फत अनुरोध गरेका छन् ।

‘नेपालमा अहिलेको जटिल अवस्थामा जुन सरकार बनेको छ र जस्तो अवस्थामा संसद् रहेको छ, नेपाल सरकारले र संसद्ले पनि अनुमोदन गर्न सक्ने अवस्था देखिन्न ।’– गौतमले भनेका छन् ।