चितवन । सिपी मैनाली नेतृत्वको नेकपा (माले)को आठौं राष्ट्रिय महाधिवेशन चितवनमा हुने भएको छ ।

नेकपा माले केन्द्रीय समितिको तर्फबाट विहीबार चितवनको नारायणगढमा पत्रकार सम्मेलन गरी आगामी कात्तिक २७ गतेदेखि महाधिवेशन हुने जानकारी दिइएको हो ।

महाधिवेशन कात्तिक २७ गतेदेखि २९ गतेसम्म नारायणघाटस्थित नारायणी कला मन्दिरमा हुने मूल आयोजक समिति संयोजक तथा स्थायी समिति सदस्य दिननाथ घिमिरेले जानकारी दिए ।

घिमिरेकाअनुसार महाधिवेशनमा देशभरबाट ३ सय ५० जना प्रतिनिधि सहभागी हुनेछन् । महाधिवेशनबाट ७५ सदस्यीय केन्द्रीय कमिटि, ११ जना स्थायी कमिटि, २१ सदस्य पोलिटब्युरो चयन गर्नुका साथै २० वटा विभागको नेतृत्व पनि चयन गरिने सो पार्टीले जनाएको छ ।

स्थानीय तह र जिल्लालाई अधिकार सम्पन्न बनाएर प्रदेश संरचना हटाउनुपर्नेबारेमा महाधिवेशनमा छलफल हुने पनि घिमिरेले जानकारी दिए ।

संसदीय व्यवस्था असफल भइसकेकाले प्रत्यक्ष निर्वाचित कार्यकारी व्यवस्था लागू गर्नेबारेमा पनि महाधिवेशनले ठोस निर्णय गर्नेछ ।

२०३५ साल पुस ११ मा स्थापना भएको माले २०५८ मा मैनालीको नेतृत्वमा पुनर्गठन गरिएको थियो ।