काठमाडौँ । नेपाल बार एशोसिएसनले प्रधानन्यायाधीश चोलेन्द्रशमशेर जबरालाई सर्वोच्च अदालतको मुख्य प्रवेशद्वारमा रोक्ने गरी प्रदर्शन गर्ने बताएको छ । दुई सातादेखि आन्दोलनरत कानुन व्यवसायीहरुले आज सर्वोच्च अदालको मुख्य प्रवेशद्धार र प्रधानन्यायाधीश जबरा सर्वोच्च प्रवेश गर्ने गेटमा समेत धर्ना दिने जनाइएको छ ।

शुक्रबार प्रधानन्यायाधीश जबरालाई प्रवेशमा रोक लगाउने भन्दै कानुन व्यवसायीहरुले प्रदर्शन गरेका थिए । तर जबरा अर्को गेटबाट सर्वोच्च अदालतभित्र प्रवेश गरेका थिए । बारले आज बिहान साढे ९ देखि साढे ११ बजेसम्म प्रधानन्यायाधीश जबरा प्रवेश गर्ने मुख्य प्रवेशद्वारमै धर्ना दिने जनाएको छ ।

प्रधानन्यायाधीश जबराले सरकारमा भाग खोजेको भन्दै सर्वोच्चका न्यायाधीश र कानून व्यवसायीहरुले उनको राजीनामा माग गर्दै आएका छन् । तर जबराले राजीनामा नदिने बताउँदै आएका छन् ।