काठमाडौँ । सरकारले एमआरपी विस्थापन गरी विद्युतीय राहदानी (ई–पासपोर्ट) जारी गर्दैछ । राहदानी विभागले बुधबारदेखि औपचारिक रूपमा विद्युतीय राहदानी जारी गर्न लागेको हो । परराष्ट्रमन्त्री डा. नारायण खड्काले राहदानी विभागको त्रिपुरेश्वरस्थित कार्यालयबाट औपचारिक रूपमा विद्युतीय राहदानी जारी गर्दैछन् ।

मेसिन रिडेबल पासपोर्ट (एमआरपी) जारी गरिरहेको नेपालले केही दिनसम्म सीमितरुपमा ई-पासपोर्ट वितरण गर्ने छ । राहदानी विभागले सन् २०२० को डिसेम्बर २० मा फ्रान्सको आईडीईएमआईए आइडेन्टी एन्ड सेक्युरिटीसँग ई–पासपोर्ट छपाइका लागि २ अर्ब ४८ करोड रुपियाँमा छपाइका लागि सम्झौता गरेको थियो । ई–पासपोर्ट जारी भएसँगै समय बुक गरेर र घरबाटै दस्तुर तिरेर आउन सकिने भएकाले राहदानी लिन लाइन बस्नु नपर्ने भएको छ ।

ई–पासपोर्टमा पासपोर्टसहित व्यक्तिगत विवरण र बायोमेट्रिक डेटा पनि राखिने छ । ई–पासपोर्ट लागू भएपछि राहदानी दुरुपयोग हुनेबाट सरकारको विश्वास छ । ६४ पृष्ठको ई–पासपोर्टमा नेपालका सम्पदा, संस्कृति, जीवनयापन, वन्यजन्तु र चर्चित ठाउँहरूको तस्बिर राखिएको छ । पहिलो र अन्तिम कभरको भित्री पृष्ठमा डाँफे र नेपालको राष्ट्रिय झण्डा राखिएको ई–पासपोर्टको पहिलो पृष्ठमा भने सगरमाथा, दोसोमा पोलिकार्बोनेट डाटा, तेस्रोमा लुम्बिनी, चौथो र पाँचौंमा राष्ट्रपति भवन, छैठौं र सातौ पृष्ठमा एकसिंगे गैंडाको तस्वीर रहने बताइएको छ ।