काठमाडौं । नेकपा (एमाले)का सचिव गोकर्ण विष्टले पार्टीको दशौं महाधिवेशन सहमति र समझादारीका आधारमा निर्वाचन हुने बताएका छन् ।

मंगलवार नेकपा(एमाले)को स्थायी कमिटी बैठकको क्रममा सञ्चारकर्मीहरुलाई संक्षिप्त प्रतिक्रिया दिदैँ विष्टले आगामी महाधिवेशनको सम्बन्धमा कुनैपनि विवाद र अन्तरविरोध नरहेको दाबी गरे ।

एमालेभित्र कुनैपनि प्रकारको विवाद र अन्तरविरोध नरहेको उनले स्पष्ट गरे । महाधिवेशनमा पार्टीभित्र किचलो र समस्या पैदा नहुने उनले दाबी गरे ।

एमालेमाथि षड्यन्त्र भइरहेको भन्दै विष्टले पार्टीलाई चारै तर्फबाट घेराबन्दी गर्ने प्रयत्न भइरहेको उल्लेख गरे ।

एमाले सचिव विष्टले एमालेभित्र कुनै गुटबन्दी र प्यानल नभएको जिकिर गरे । एमालेलाई गुटरहित र प्यानलरहित बनाउनेगरी अघि बढ्ने उनले बताए ।

‘बाहिर जुन प्रकारले एमालेको महाधिवेशनमा भाँडभैलो होलाकी भनेर मान्छेले अनुमान, कल्पना गरेका होलान् । त्यो प्रकारको अवस्था आउँदैन ।’– विष्टले भने ।

एमालेभित्र कुनै गुटबन्दी, प्यानल नभएको दाबी गर्दै विष्टले गुटरहित, प्यानलरहित एमाले निर्माणको लागि अगाडि बढ्ने बताए ।

त्यसैगरी, एमाले नेता रघुविर महासेठले उम्मेदवारी घोषणा गर्नेहरुले निर्वाचनको समयसम्म उम्मेदवारी फिर्ता लिने दाबी गरे ।

जुन प्रतिनिधिको बलमा उम्मेदवारी घोषणा गरिएको छ सोही प्रतिनिधिको प्रस्तावमा उम्मेदवारी फिर्ता हुने उनको भनाइ छ ।

बहुसंख्यक ८० प्रतिशतभन्दा बढी प्रतिनिधिहरु सहमतिको पक्षमा रहेको महासेठले बताए । केही नेताहरुले आवेशमा आएर उम्मेदवारी घोषणा गरेको नेता महासेठको टिप्पणी छ ।