काठमाडौं । नेपाली कांग्रेसको १४औँ महाधिवेशन अन्तर्गत प्रदेश सभा क्षेत्रीय अधिवेशन सोमबार भएका स्थानमा अधिवेशन भएका स्थानको नतिजा आउन थालेको छ ।

काठमाडौंका १० मध्ये ६ वटा निर्वाचन क्षेत्रको मतपरिणाम सार्वजनिक भएको छ । जसमा ५ निर्वाचन क्षेत्रमा प्रकाशमान सिंह र गगन थापा समूह बलियो देखिएको छ ।

कृष्णप्रसाद सिटौला निकट भीमसेनदास प्रधान निकट समूहले एक क्षेत्रमा जितेका छन् । काठमाडौंमा सभापति शेरबहादुर देउवालाई सिटौलाको समर्थनमा वडा अधिवेशनबाट नै गठबन्धन भएको छ ।

१४ औं महाधिवेशनमा सिंह सभापतिको दाबेदार हुन् भने थापा महामन्त्रीका दाबेदार छन् ।

पाँच क्षेत्रमा प्रकाशमान–गगन बलियो

काठमाडौं निर्वाचन क्षेत्र १ मा रविन्द्र विक्रम राणा क्षेत्रीय सभापति बनेका छन् । उनी प्रकाशमान सिह निकट हुन् । उनी निवरोध निर्वाचित बनेका हुन् ।

क्षेत्र नम्बर २ मा करिब शर्मा क्षेत्री सभापतिमा बिजयी भएका छन् । उनी भिम्सेनदास प्रधान निकट मानिन्छन् भने उनले सिंह निकट अर्जुन पराजुलीलाई पराजित गरेका हुन् । क्षेत्र नम्बर ३ मा अहिले मतदान जारी रहेको निर्वाचन समितिले जनाएको छ ।

क्षेत्र नम्बर ४ मा श्यामकृष्ण संगत क्षेत्रीय सभापतिमा निर्वाचित भएको निर्वाचन समितिले जनाएको छ । काठमाडौं ४ नम्बर गगन थापाको क्षेत्र पनि हो । श्यामकृष्ण गगन थापा निकट मानिन्छन् । उनी सर्वसम्मत भएका हुन् ।

क्षेत्र नम्बर ५ मा श्याम खड्का क्षेत्रीय सभापति भएका छन् । उनलाई अधिवेशनमा कांग्रेस भित्रको कृष्णप्रसाद सिटौला समूहको पनि समर्थन थियो । उनले देउवा निकट रमेश खड्का भने पराजित गरेका हुन् । सो क्षेत्रमा सचिव पदमा रजनी थापा र पञ्चकुमारी श्रेष्ठ निर्वाचित भएका छन् । थापा खड्का समूहबाटै सचिव निर्वाचित भएकी हुन् ।

क्षेत्र नम्बर ७ को मुकुन्द रिजाल क्षेत्रीय सभापतिमा विजयी छन् । उनले देउवा निकट मनोहरी तिवारीलाई पराजित गरेका हुन् । रिजाल प्रकाशमान सिंह र गगन थापा निकट मानिन्छन् ।

क्षेत्र नम्बर ८ मा राजेश श्रेष्ठ सभापति पदमा निर्वाचित भएका छन् । श्रेष्ठ प्रकाशमान सिंह निकट हुन् । गएराति आएको नतिजामा श्रेष्ठले ११९ मत ल्याएका हुन् । उनका प्रतिद्धन्द्धी तेविन्द्र शाक्य पराजीत बने ।

शाक्यले जम्मा ४९ मत मात्रै पाएका छन् । श्रेष्ठ र शाक्य दुवै जना कांग्रेस पूर्व महामन्त्री प्रकाशमान सिंह निकट हुन् । तर शाक्यले भने यसपटक सिंहको समर्थन पाएनन् । सो क्षेत्रमा क्षेत्रीय सचिवका लागि भएको निर्वाचनमा पनि श्रेष्ठ प्यालनकै पुष्करराज पाण्डे र शंकर पुडासैनीले क्रमस १३९ र ९८ मत प्राप्त गर्दै विजयी भएका छन् ।

कार्यसमिति सदस्यमा नै कन्चना नेपाली, केदारमान सिंह, गौतम शाक्य, बालमुकुन्द श्रेष्ठ, देउका केसी ,भगवत्ती थपलिया, रत्नकेशरी खड्गी, सुभेष झा, मिनबहादुर चौहान, राजेन्द्रगोपाल तण्डुकार र सन्जेशमान डंगोल निर्वाचित भएका छन् ।

अहिले क्षेत्र ६, ९ र १० मा मतदान जारी छ । कांग्रेसले मंसिर १० मा जिल्ला अधिवेशन, मंसिर १६ र १७ मा सातै प्रदेशमा अधिवेशन गर्दैछ । आगामी मंसिर २४ देखि २६ गतेसम्म केन्द्रीय महाधिवेशन भने काठमाडौंमा हुँदैछ ।