काठमाडौँ । नेकपा एमालेको १० औँ महाधिवेशन आजदेखि सुरु हुने भएको छ । चितवनको नारायणी नदी किनारमा हुने सम्मेलन आगामी तीन दिनसम्म चल्ने भएको हो ।

महाधिवेशन प्रचार विभाग प्रमुख योगेश भट्टराईले महाधिवेशनको तयारी पूरा भएको जानकारी दिएका थिए । महाधिवेशनका लागि एमाले अध्यक्ष केपी ओलीसहित शीर्ष नेताहरू बिहीबार नै चितवन पुगिसकेका थिए ।

महाधिवेशनको उद्घाटन सत्रमा पार्टी कार्यकर्ता, शुभेच्छुक र आम जनसमुदायसमेत गरी पाँच लाख जना सहभागी हुने एमालेले जनाएको छ । सहभागीलाई नारायणी नदी किनारको नारायणगढ र गैँडाकोट दुवैतर्फ राखिने भएको छ ।

बन्द सत्रमा भूगोल, जनसंगठन, विभाग, सम्पर्क कमिटी र प्रवास कमिटीका गरी दुई हजार १७५ प्रतिनिधि र १०३ जना पर्यवेक्षक सहभागी हुने छन् । प्रतिनिधिहरूमध्ये ६२७ जना महिला प्रतिनिधि हुने छन् । दलित उत्पीडित क्षेत्रबाट २०९ जना प्रतिनिधि आउने छन् ।

कार्यक्रमलाई सम्बोधन गर्न प्रधानमन्त्री तथा नेपाली कांग्रेसका सभापति शेरबहादुर देउवासमेत सहभागी हुने प्रचार विभाग प्रमुख भट्टराईले जानकारी दिए ।

बन्दसत्रलाई पार्टी अध्यक्ष ओली र विदेशी पाहुनाले सम्बोधन गर्ने कार्यक्रम छ । महाधिवेशनमा भारत, बंगलादेश, श्रीलंका, कम्बोडियालगायत विभिन्न देशका राजनितिक दलका नेताहरू सहभागी हुने प्रचार विभाग प्रमुख भट्टराईले बताए । ११ गते बिहान ८ बजेदेखि बन्दसत्र सुरु हुने र बन्दसत्र सञ्चालनका लागि ११ सदस्यीय अध्यक्ष मण्डल बनाइएको उनले जानकारी दिए ।

आगामी १२ गते बिहान ८ बजेबाट मतदान सुरु हुने छ । सय वटा इलेक्ट्रोनिक भोटिङ मेसिनमध्ये १० वटा स्टक राखेर ९० वटामा भोटिङको काम हुने भएको हो । त्यस दिन साँझसम्म मतपरिणाम सार्वजनिक गर्ने कार्य तालिका रहेको छ ।