चितवन । नेकपा एमालेको १० औँ महाधिवेशन उद्घाटन समारोह स्थल नारायणी नदी किनारमा नेता तथा कार्यकर्ता उपस्थित हुन सुरु भएको छ । शुक्रबार दिउँसो उद्घाटन हुने महाधिवेशनका लागि देशभरबाट नेता तथा कार्यकर्ता आउने क्रम सुरु भएको हो ।

आज बिहानदेखि चितवनमा महाधिवेशनका लागि जनलहर आउन सुरु भएको नेकपा एमाले चितवनकी अध्यक्ष पार्वती रावलले बताइन् । महाधिवेशन उद्घाटनमा सहभागी हुन पूर्व तथा पश्चिमका विभिन्न जिल्लाबाट प्रतिनिधि तथा नागरिकहरुको बाक्लो उपस्थिति रहेको छ । चितवनबाट बाजासहित जनसहभागिता हुने तयारी भइरहेको जिल्ला अध्यक्ष रावलले जानकारी दिइन् ।

चितवनका सबै स्थानीय तहका ९८ वटा वडा, दुई वटा शाखा कमिटी तथा भातृ संगठनबाट एक लाख मानिस उतार्ने गरी तयारी भएको जिल्ला अध्यक्ष रावलले बताइन् । महाधिवेशन उद्घाटन हुनुपूर्व चितवनतर्फको नदी किनारमा मानिसहरूको व्यापक सहभागिता हुने भएको छ ।

जिल्लाका मुख्य राजमार्ग र सहायक राजमार्गमा गरी ४५ भन्दा बढी स्थानमा स्वागतद्वार निर्माण गरिएको छ । दिउँसो उद्घाटन हुने महाधिवेशनको बन्द सत्र भोलि र पर्सी सौराहामा हुने छ ।