काठमाडौँ । नेकपा एमालेको नवौँ केन्द्रीय कमिटीको अन्तिम बैठक शुक्रबार राति १ः३० बजे बस्दै विधान संशोधन गरेको छ । बैठकले पदाधिकारी र सदस्यहरूको संख्या थप गर्ने निर्णय गरेको हो ।

संशोधित विधानअनुसार नेकपा एमालेको पदाधिकारीको संख्या थपेर १५ बाट १९ हुने भएको छ । सर्वसम्मतमा नेतृत्व चयन गर्नका लागि पार्टी अध्यक्ष केपी शर्मा ओलीले दुई उपाध्यक्ष र दुई महासचिव थप गर्ने प्रस्ताव गरेका थिए ।

असोज तेस्रो साता ललितपुरमा भएको पार्टीको विधान महाधिवेशनले १५ सदस्यीय पदाधिकारी बनाउने निर्णय गरेको थियो । जसमा अध्यक्ष, वरिष्ठ उपाध्यक्ष, चार उपाध्यक्ष, महासचिव, उपमहासचिव र सात सचिव हुने व्यवस्था गरेको थियो ।

यस्तै, विधान महाधिवेशनले पोलिटव्यूरो खारेज गरी ४५ सदस्यीय स्थायी कमिटी र २२५ सदस्यीय केन्द्रीय कमिटी बनाइएको थियो । तर, शुक्रबार १० औँ राष्ट्रिय महाधिवेशनको उद्घाटनपछि बसेको बैठकले पोलिटब्युरो ब्यूँताउने भएको छ भने केन्द्रीय कमिटीमा ३०१ सदस्यीय हुने व्यवस्था गरिएको छ ।

पार्टी कार्यालयका सचिव शेर बहादुर तामाङका अनुसार अब एमाले पदाधिकारीमा अध्यक्ष, वरिष्ठ उपाध्यक्ष, छ उपाध्यक्ष, महासचिव, तीन उपमहासचिवर सात सचिव हुने भएको छ । यस्तै, उनले दुई उपाध्यक्ष र दुई उपमहासचिव थपेर पदाधिकारी संख्या १९ पुर्‍याएको जानकारी दिएका हुन् ।

यसैगरी, ४५ सदस्यीय स्थायी कमिटी कायमै राख्ने, ९९ सदस्यीय पोलिटब्यूरो गठन गर्ने र २२५ सदस्यीय केन्द्रीय कमिटीलाई ३०१ बनाउने प्रस्ताव बैठकले अनुमोदन गरेको जनाएको छ ।