काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ नेता तथा कार्यकर्तालाई पार्टी प्रवेश गराउँदै चितवन सबैको नजरमा परेको बताएका छन् । शनिबार चितवनमा आयोजित एक कार्यक्रममा बोल्दै धेरैले हामीलाई हेर्न चाहेकाले सबैको नजरमा परेको बताएका हुन् ।

प्रचण्डले माओवादी नै मजदुर, किसान, महिलालगायत विभिन्न तह र तप्कामा मानिसको हक अधिकारका लागि लडेको बताए । यसै क्रममा उनले आफूलाई शक्तिशाली पार्टी बताउनेहरू यस परिवर्तनलाई उल्टाउने पक्षमा रहेको दाबी गरे ।

‘अलिअगाडि ठूलो मेला लाग्यो नि नारायणीको तिरमा, त्यो चितवनलाई माया गरेरै त होला, चितवनलाई हेला गरेर त पक्कै पनि होइन होला, यहाँको बाटाघाटा हेर्नलाई पनि होला,’ नेकपा एमालेलाई लक्षित गर्दै उनले भने, ‘अनि प्रचण्ड र रेणुलाई जिताउने जनता कस्ता रहेछन भनेर तपाईहरूलाई हेर्न पनि होला, प्रचण्डलाई हेला गरेर भए पनि चितवन आए, तपाई हामी सबैलाई खुसीकै कुरा हो, मैले भनेको छु, अरु पनि चितवन नै आए हुन्छ ।’

उनले पार्टीमा जोडिन पुगेका सबै नेता तथा कार्यकर्तालाई धन्यावाद दिँदै शुभकामना दिए ।