काठमाडौँ । राष्ट्रिय प्रजातन्त्र पार्टी (राप्रपा)को अध्यक्षमा कमल थापा पराजित भएका छन् । करिब १९ वर्ष पार्टीको अध्यक्ष भएर काम गरेका थापा राप्रपाको राष्ट्रिय एकता महाधिवेशनबाट अध्यक्षमा पराजित भएका हुन् ।

थापालाई पराजित गर्दै युवा नेता राजेन्द्र लिङ्देन अध्यक्षमा विजयी भए । लिङ्देनले १८१७ मत प्राप्त गर्दा थापाले १६१७ मत ल्याए । अध्यक्षमा पराजित थापाले पार्टीको आन्तरिक प्रतिस्पर्धामा निर्मल निवासले नांगो हस्तक्षेप गरेको बताएका छन् ।

उनले सामाजिक सन्जालमा लेखेका छन्, ‘पार्टीको आन्तरिक प्रतिस्पर्धामा निर्मल निवासको नांगो हस्तक्षेपको भत्सर्ना गर्दछु। मैले राहत र उन्मुक्ति पाएको छु । सिङ्गो मुलुक गणतन्त्रमय भएको बेला शिरमा कफन बाँधेर २०६३ सालदेखि राजसंस्था बोकेर हिँडेको पुरस्कार आज पाईयो । सो एजेण्डाको मुल संवाहकलाई राजनीतिकरुपमा समाप्त पार्न गरिएको चेष्टाले राजाको भलो होस् ।’

तर थापाले आफ्नो हार स्वीकार गर्दै लिङ्देनलाई बधाई दिएका छन् । उनले ‘प्रजातान्त्रिक मूल्य र मान्यता आत्मसात गर्दै राप्रपा अध्यक्ष पदको निर्वाचनमा भएको पराजय सहर्ष स्विकार गर्दछु । नवनिर्वाचित अध्यक्ष राजेन्द्र लिङदेनलाई बधाई तथा शुभकामना ।’ शनिबार भएको मतदानको आइतबार बिहान मत परिणाम आएको हो ।