काठमाडौं । नेपाली कांग्रेस प्रदेश १ को सभापतिमा उद्धब थापा निर्वाचित भए । संस्थापन इतर पक्षका गुरु घिमिरे थापासँग मात्र २ मतले पराजित भए । घिमिरे झिनो मतले पराजित भएपछि संस्थापन इतर पक्षमा खैलाबैला नै मच्चिएको छ ।

अहिले घिमिरेको पराजयको कारण संस्थापन इतर समूहमा खोजी भइरहेको छ । प्रदेश सभापतिमा पराजित घिमिरे नेबि संघका पूर्व केन्द्रीय अध्यक्ष तथा कांग्रेस केन्द्रीय सदस्यसमेत रहेका थिए ।

मोरङका एक नेताका अनुसार घिमिरेले करिब २६० मतले जित्ने अनुमान थियो । ती नेताले घिमिरेको हारमा तीन जना केन्द्रीय नेतामाथि आरोप लगाएका छन् ।

शेखर, सुजाता र महेशले मतदान गरेनन्

मतदानस्थलमै पुगेर पनि मतदान नगरेको मोरङका नेता कार्यकताको आरोप छ । केन्द्रीय नेताहरु अझ अहिलेका सभापतिका आकांक्षी डा. शेखर कोइराला, सुजाता कोइराला र महेश आचार्यले मतदान नगर्दा घिमिरेले हारेको संस्थापन इतर पक्षकै नेता कार्यकताको आरोप छ । यदि तीन जनाले घिमिरेलाई मतदान गरेको भए घिमिरे एक मतले निर्वाचन हुन्थे ।

पूर्वमहामन्त्री कृष्णप्रसाद सिटौला र देउवा समूहबाट उठेका थापाले ८४४ मत ल्याए भने संस्थापन इतर समुहबाट मैदानमा होमिएका घिमिरेले ८४२ ल्याएर पराजित भए । शनिबार भएको मतदानमा १८०४ मत खसेको थियो ।

थापालाई सभापति शेरबहादुर देउवा समुहले पनि समर्थन गरेको थियो ।

शेखरले मतदान नगरेकोमा मागे माफी

प्रदेश १ को सभापतिमा गुरु घिमिरे पराजित भएपछि नेता शेखर कोइरालाले माफी मागेका छन् । शेखर मतदानस्थलमा उपस्थित भएर पनि मतदान गरेका थिएनन् ।

शेखरले मतदानस्थलमै भएर पनि मतदान नगरेको भन्दै आफ्नै गुटभित्र आलोचित बनेपछि सामाजिक सञ्जालबाटै उनले माफी मागेका छन् ।

तर उनको माफीको कुनै अर्थ नभएको कार्यकर्ताको भनाई छ । ‘अब सायद यसको मूल्य शेखर आफैले आसन्न महाधिवेशनमा चुकाउनुपर्नेछ ।’– उनी निकटकै एक कार्यकर्ताले भने ।

कांग्रेस १४औं महाधिवेशनमा प्रदेशसम्म केन्द्रीय नेताहरूले मतदान गर्न पाउने–नपाउने विषय सुरुदेखि नै ‘संशय’ थियो । कानुनी परामर्शबाट मतदान गर्दा भविष्यमा जटिलता आउन सक्ने बुझियो, ‘तसर्थ मतदान नगर्नु उपर्युक्त ठानेँ । यसक्रममा मबाट भएको कमजोरीप्रति सचेत रहँदै गल्ती भए क्षमाप्रार्थी छु,’ शेखरले सामाजिक सञ्जालमा लेखेका छन् ।