काठमाडौं । नेपाली कांग्रेसको १४औं महाधिवेशनमा कांग्रेसका नेता भीष्मराज आङ्देम्बेले सहमहामन्त्री पदमा उम्मेदवारी घोषणा गरेका छन् ।

सोमबार काठमाडौंमा पत्रकार सम्मेलन गरेर आङ्देम्बेले १४औं महाधिवेशनमा सहमहामन्त्री (आदिबासी/जनजाती) पदमा उम्मेदवारी दिने घोषणा गरेका हुन् । उनले उम्मेदवार घोषणा गदै १३ बुँदे आफ्ना एजेन्डा समेत प्रस्तुत गरे ।

पार्टीको सदस्यता प्रणालीलाई व्यवस्थित र आकर्षक बनाउँदै लैजान आफुले सह महामन्त्रीमा उम्मेदवारी दिएको उनले बताए ।

नेपाली कांग्रेस पार्टीलाई चुस्त र दुरुस्त बनाउदै २१औं शताब्दीको पार्टीमा रुपान्तरित गरी २१औं शताब्दीका युवा उमेर र सोचहरुलाई नेतृत्व गराउन सक्ने पार्टीमा रुपान्तरित गर्न सकिन्छ र त्यही ढंगबाट पार्टीलाई चलायमान गर्न नेतृत्वको आवश्यकता रहेकोले आफुले उक्त पदमा उम्मेदवारी दिन लागेको जनाए ।

आदिवासी/जनजातीको तर्फबाट आफ्नो उम्मेदवारी रहेको उनले बताए ।

समावेशी र सहभागितामूलक लोकतन्त्रलाई सार्थक बनाउन वर्तमान संविधानको रक्षा गर्दै यसको इमान्दारीपूर्वक कार्यान्वयन गर्न नेपाली कांग्रेसलाई सबल र एकताबद्ध बनाउन आफुले पहल गर्ने उनले दाबी गरे ।

पार्टीलाई वैचारिक रुपमा स्पष्ट, सांगठनिक रुपमा गतिशिल र भावनात्मक रुपमा एकतावद्ध अनि अनुशासित र प्रशिक्षित कार्यकर्ताको उर्जाशील अभियानका रुपमा विकास उनले बताए ।