काठमाडौं । नेपाली कांग्रेसको संस्थापनइतर समूहमा पछिल्लो समय असन्तुष्टी रहँदै आएका प्रकाशमान सिंह पनि सोमवारको गुटगत बैठकमा सहभागी भएका छन् ।

कांग्रेस बरिष्ठ नेता रामचन्द्र पौडेल निवास बोहोराटारमा सोमवार साँझा संस्थापन इतर समूहको छलफल भएको थियो । संस्थापन इतर समूहको छलफलबाट दुई दिनभित्रै सहमतिमै साझा उम्मेदवार बनाउने निश्कर्ष निकालिकाएको छ ।

पौडेल निवासमा बसेको सभापतिका अकांक्षीहरुको बैठकले २ दिनभित्रै सभापतिको साझा उम्मेदवारबारे तय गर्ने निर्णय गरेको हो ।

बैठकमा पौडेलसहित महामन्त्री डा.शशांक कोइराला, पूर्व महामन्त्री प्रकाशमान सिंह र नेता डा. शेखर कोइराला सहभागी थिए । पौडेलसहित कांग्रेसका संस्थापन इतर चारै जना नेताहरु सभापतिको दाबेदार छन् ।

बैठकमा महाधिवेशन अन्तर्गत भएको प्रदेश तथा जिल्ला अधिवेशनकाबारेमा पनि समीक्षा भएको थियो । प्रदेश अधिवेशनबारेमा आफ्ना पक्षका सबै बसेर थप समीक्षा गर्नुपर्ने निश्कर्षमा उनीहरु पुगेका छन् ।

सभापतिको उम्मेदवारबारे छलफल गर्न मंगलबार संस्थापनइतर समूहको केन्द्रीय सदस्यहरूको बैठक बस्दैछ ।