काठमाडौँ । नेकपा एमालेको केन्द्रीय कमिटीको आज बस्दै छ । चितवनमा सम्पन्न दशौँ महाधिवेशनपछिको स्थायी कमिटी, पोलिटब्यूरो गठनलगायतका १५ ओटा कार्य सूचीमा छलफल गर्न एमालेले केन्द्रीय कमिटीको बैठक बोलाएको हो ।

बैठक दिउँसो १ बजे भक्तपुरको जर्मन हाउस हस्पिटालिटी गठ्ठाघरमा बस्ने भएको हो । पार्टी कार्यालयमा ठाउँ अभाव हुने भएकाले एमालेले भक्तपुरको जर्मन हाउसमा बैठक बोलाएको हो ।

बैठकमा १५ वटा कार्य सूचीमाथि छलफल हुने एमाले केन्द्रीय कार्यालयका सचिव शेरबहादुर तामाङले जानकारी दिए । बैठकमा बाँकी केन्द्रीय सदस्यको शपथ ग्रहण, महाधिवेशनको समीक्षा, केन्द्रीय कमिटीमा सदस्यको मनोनयन, पोलिटब्यूरो गठन, स्थायी कमिटीको गठन, केन्द्रीय सल्लाहकार परिषद् गठन, कार्य विभाजन र प्रदेशमा रिक्त पदाधिकारीको मनोनयन, जिल्ला र प्रदेश अधिवेशनको मिति निर्धारण, विधान सम्पादन र नियमावली संशोधन, बैठक सञ्चालन कार्यविधि, केन्द्रीय कार्यालय व्यवस्थापन, महाधिवेशनको सन्देश तथा पार्टी प्रवेश अभियान, वरियताक्रम निर्धारण र जनसंगठनको सुदृढीकरण अभियानलगायत बैठकका एजेण्डा रहेको तामाङले जानकारी दिए ।

कार्यालय सचिव तामाङका अनुसार केन्द्रीय कमिटी बैठकअगाडि ११ बजे अध्यक्ष केपी शर्मा ओलीको निवास बालकोटमा सचिवालय बैठक बस्ने तय भएको छ ।