काठमाडौं । अमेरिकी सहयोग परियोजना एमसीसी विरोधी राजनीतिक दलहरु एक ठाउँमा उभिएका छन् ।

मंगलबार शुरु हुन लागेको संघीय संसदको दशौं अधिवेशनमा एमसीसीको प्रस्ताव लैजान लागेको भन्दै दलहरु आन्दोलित भएका हुन् ।
माओवादी नेता नारायण शर्माको संयोजकत्वमा गठिन एमसीसी खारेज अभियानले मंगलबार काठमाडौंका नयाँ बानेश्वरस्थित संसद भवन घेराउ गर्न लागेको हो ।

संघीय संसदको तीन वटा आर्कबाट प्रदर्शन गर्ने तयारी गरिएको अभियानका संयोजक नारायण शर्माले जानकारी दिए ।
पूर्वी आर्क शान्तिनगर गेट अगाडि, पश्चिमी आर्क एभरेस्ट होटेल अगाडि र उत्तरी आर्क व्हाइट हाउस कलेज अगाडिबाट घेराउ गर्ने शर्माले बताए । उनीहरुले अपरान्ह १२ः ३० देखि प्रदर्शन गर्ने जनाएका छन् ।

एमसीसीको विरोधमा मोहन वैद्य नेतृत्वको नेकपा (क्रान्तिकारी माओवादी), विप्लव नेतृत्वको नेकपासहित २६ भन्दा बढी दल तथा संगठनहरु अभियानमा सहभागी छन् ।

देशब्यापी आन्दोलन थालेको एमसीसी खारेजी अभियान अन्तर्गत संयुक्त संघर्ष समिति चितवनले मंगलबार चितवन जिल्ला बन्द गराएको छ ।

चितवन बन्दको क्रममा प्रहरीले मंगलबार विहानै क्रान्तिकारी माओवादीका चितवन इन्चार्ज घनश्याम सापकोटा ‘विकास’लाई पक्राउ गरेको छ ।

अभियानका केन्द्रीय संयोजक शर्माले आज नै विज्ञप्ति जारी गरी सापकोटालाई पक्राउ गरिएकोमा निन्दा गर्दै ससम्मान शीघ्र रिहाईको माग गरेका छन् । संघर्ष समितिले सोमवार काठमाडौंस्थित एमसीए कार्यालय अगाडि प्रदर्शन गरेको थियो ।

संसदको अधिवेशन आज दिउँसो २ बजेका लागि बोलाइएको छ ।