काठमाडौं । नेपाली कांग्रेसको १४ औं महाधिवेशनबाट उपभापतिमा उठेका सात प्रतिष्पर्धी मध्ये कसले चुनाव जित्दैछ भन्ने कांग्रेसवृत्तमा निकै चासोको विषय बनिरहेको छ ।

सभापतिमा निर्वाचित शेरबहादुर देउवासहित नेतृत्वका लागि चुनाव लडेका डा. शेखर कोइराला, प्रकाशमान सिंह, विमलेन्द्र निधि चारै जना प्यानल बनाएर प्रतिष्पर्धामा थिए । यद्यपि देउवाबाहेक अन्यले सिङ्गो प्यानल बनाउन सकेका थिएनन् ।

सभापतिको मत परिणाम सार्वजनिक भएपछि बुधबारदेखि उपसभापति पदको मत गणना गरिँदैछ ।

उपसभापति पदमा देउवा प्यानलबाट पूर्णबहादुर खड्का र बिजय गच्छदार प्रतिष्पर्धामा छन् । देउवाको प्राप्त परिणामले खड्का र गच्छदार दुवैले जित्ने आंकलन पनि कांग्रेसवृत्तमा छ । तर देउवाका सहयात्री खड्काले प्यानलको भोट पाए पनि गच्छदारप्रति सिङ्गो देउवा गुट सन्तुष्ट छैन ।

कांग्रेस नेता महेश आचार्य र डा. चन्द्र भण्डारी पार्टीमा वैचारिक नेताका रुपमा चिनिन्छन् । आचार्य एक्लो प्रतिष्पर्धामा छन् भने भण्डारी शेखर प्यानलका हुन् । भण्डारीसँगै धनराज गुरुङ पनि कांग्रेसका हठी नेताका रुपमा चिनिन्छन् ।

यता, शेखर कोइरालासँग रुष्ट भएका कोइराला परिवारकै सुजाता पनि प्रकाशमान समूहबाट प्रतिष्पर्धामा आइन् । तर प्रकाशमानको परिणाम हेर्दा सुजाताको अवस्था पनि कमजोर देखिन्छ ।

सभापतिमा चौंथो स्थानमा रहेर पराजित भएका विमलेन्द्र निधिको समूहबाट उपसभापतिमा उम्मेदवार बनेकी दिब्यश्वरी शाह कांग्रेसभित्रै स्थापित हुन नसकेकी नेतृ हुन् ।

जुनसुकै प्यानलबाट उम्मेदवार बने पनि पार्टीमा राम्रै छाप पार्न सफल भएकालाई चुनावमा पनि छाप लागेको छ । सम्भवतः उपसभापतिको बलियो प्रतिष्पर्धामा पूर्णबहादुर खड्का, धनराज गुरुङ र चन्द्र भण्डारी रहने चर्चा कांग्रेस नेताहरुबीच चलिरहेको छ ।