काठमाडौं । नेपाली कांग्रेसको १४ औं महाधिवेशनमा उपसभापति पदको मतपरिणाममा विजयकुमार गच्छदारले असहमति जनाएका छन् । गच्छदार सभापति शेरबहादुर देउवा पक्षका उपसभापतिका उम्मेदवार हुन् ।

गच्छदार शेखर कोइराला समुहका धनराज गुरुङसँग दुई मतान्तरले पराजित बनेपछि अहिले कांग्रेस पार्टी कार्यालय मतगणना स्थलमा नै आउने भनी आफ्ना प्रतिनिधिलाई जानकारी गराएको एक गच्छदार निकट नेताले बताए । गच्छदार मतगणनास्थल आउँदै गरेकाले मत परिणामको आधिकारिक घोषणा नभएको स्रोत बताउँछ । ‘दाईलाई मतपरिणाममा चित्त बुझेन,त्यसैले पुन मत गणानाको मागसहित मत गणना स्थल जानु भएको हो,’ स्रोतले भन्यो ।

यसअघि निर्वाचन समितिले देउवा पक्षका पूर्णबहादुर खड्का र शेखर कोइराला पक्षका धनराज गुरुङले उपसभापति पदमा विजयी हासिल गरेको कुरा अनौपचारिक रुपमा जानकारी दिएपनि औपचारिक रुपमा घोषणा गरिसकेको छैन ।