काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले राष्ट्रिय सम्मेलनका लागि तयार पारेको राजनीतिक दस्तावेज शुक्रबार स्थायी समितिमा पेश गरेका छन् ।

प्रचण्डले यहि पुस ११ गतेदेखि सुरु हुन लागेको राष्ट्रिय सम्मेलनका लागि अहिलेसम्मकै सबैभन्दा ठूलो दस्तावेज तयार पारेका छन् । प्रचण्डले तयार पारेको एक सय पृष्ठ लामो राजनीतिक दस्तावेजमा माओवादी जनयुद्धको दश वर्ष र त्यसयताका शान्ति प्रक्रियामा आएपछिको पार्टीको भूमिकाको बारेमा चर्चा गरेका छन् ।

विगतमा पटक पटक निरन्तरतामा क्रमभंगको कुरा गर्ने गरेका प्रचण्डले यो दस्तावेजमा अर्को क्रमभंगताको चरणमा प्रवेश गरेको उल्लेख गरेका छन् । क्रमभंगता विचारबाटै हुने प्रचण्डले आफ्नो दस्तावेजमा स्पष्ट गरेका छन् ।

प्रचण्डले पुस्तकाकार दिएर तयार गरेको दस्तावेजमा मुख्यतः पार्टीलाई नयाँ क्रान्तिकारी विचारका रुपमा अघि सार्नुपर्नेमा जोड दिएका छन् । एउटा सशक्त क्रान्तिकारी पार्टीलाई सारमा अन्य संसदवादी पार्टी सरह नभई विचार प्रधान पार्टीका रुपमा प्रचण्डले ब्याख्या गरेका छन् ।

‘हाम्रो पार्टी नै त्यस्तो पार्टी हो, जसले विचारलाई विकास र परिमार्जन गर्दै संगठनलाई क्रान्तिकारी रूपान्तरण गर्ने हिम्मतसहित, फेरि एउटा महान् आन्दोलनको नेतृत्व गर्न सक्ने गुणतत्व भएको, त्यो सपना बोक्ने मान्छेहरू भएको पार्टी नै हो ।’– उनले भनेका छन् ।

पार्टीको क्रान्तिकारी रूपान्तरणको निम्ति, आफ्नो ऐतिहासिक मिसन अगाडि बढाउनको निम्ति र यो राष्ट्रलाई समाजवादमा पु¥याउने लक्ष्य तथा जनयुद्ध र जनआन्दोलनकाबेला जनतासामु गरेको प्रतिवद्धता पूरा गर्ने अटोट पनि प्रचण्डले दस्तावेजमा उल्लेख गरेका छन् ।

मजदुर किसान, उत्पीडित वर्ग, उत्पीडित जाति, सबै मधेसी, जनजाति, दलित, महिला, मुस्लिम सबै समुदायको पहिचान र अधिकारलाई मात्र नभई उनीहरूको आत्म सम्मानलाई स्थापित गरिछाड्ने प्रचण्डले अठोट गरेका छन् ।

विगतमा आफूहरुले विकास र समृद्धिको यो नयाँ मोडेल देशलाई दिनेछौं भनी गरेको प्रतिवद्धता पूरा गर्न नयाँ क्रान्तिकारी विचारका साथ अघि बढ्ने कुरामा प्रचण्डको जोड रहेको छ । यद्यपि राष्ट्र निर्माणका लागि गति दिने क्रममा कहिँ कतै अल्मलिएको हो कि भन्ने आशंका पनि प्रचण्डले गरेका छन् ।

आजको विश्व सन्दर्भ, अन्तर्राष्ट्रिय सन्दर्भ र राष्ट्रिय सन्दर्भसमेतलाई ध्यान दिएर राष्ट्रको एकतालाई बचाउन फेरि एकचोटि महाअभियान चलाउनुपर्नेमा प्रचण्डले जोड दिएका छन् ।

विचारलाई विकास र परिमार्जन गर्दै संगठनलाई क्रान्तिकारी रूपान्तरण गर्ने हिम्मतसहित, फेरि एउटा महान् आन्दोलनको नेतृत्व गर्न सक्ने गुणतत्व भएको, त्यो सपना बोक्ने मान्छेहरूको पार्टीका रुपमा पनि माओवादीलाई ब्याख्या गरेका छन् ।

प्रचण्डले जनताका सपना, शहीद तथा वेपत्ता योद्धाहरुको सपना, उनीहरूका त्याग तपस्या, करोडौं जनताले माओवादी पार्टीबाट गरेको अपेक्षा पूरा गर्ने अठोट दोहोर्याएका छन् । आफूभित्रैबाट आलोचना आत्मालोचना गरी अघि बढ्नुपर्नेमा उनले जोड दिएका छन् ।