बिराटनगर । नेकपा एमालेका अध्यक्ष केपी शर्मा ओलीले संसदको अवरोध चुनावसम्मै कायमै रहने बताएका छन् । एमालेले निरन्तर संसद अवरोध गरिरहेको तर्फ पत्रकारहरुले ओलीसँग सोधेको प्रश्नमा उनले चुनावसम्मै संसद अवरोध कायम रहने बताएका हुन् ।

शनिबार विराटनगरमा पुगेका ओलीले पत्रकारहरूसँग त्यस्तो बताएका हुन् । आफूहरूले पार्टीबाट निष्कासन गरेका मान्छेहरूलाई राखेर सरकारले बोलाएको सर्वदलीय बैठकमा पनि आफूहरू सहभागी नहुने ओलीले प्रष्ट पारेका छन् ।

संसद अवरोध कहिलेसम्म ? पत्रकारको प्रश्नमा ओलीले एकशब्दमै जवाफ दिए -चुनावसम्म ।

चुनाव अगाडिसम्म संसद चल्दैन त भन्ने प्रश्नमा ओलीले बलजफती संसद चलाइरहेको बताए । ‘चलिरहेको छ त, हामीले विरोध गरिरहेका छौं, संसद चलिरहेको छ । बलजफ्ती गर्ने बानी परेकाले बलजफ्ती गरिरहेका छन्’ ओलीले भने ।

ओलीले सकभर चाडो निर्वाचन गर्दा राम्रो हुने बताए । अर्ली इलेक्सन भए पनि नभए पनि इलेक्सन हुनुपर्छ, इलेक्सन भएपछि धोपीपाट लगाइन्छ ।’

जसपाबाट निर्वाचित जहदा गाउँपालिका ७ का वडाध्यक्ष भगवानलाल बेसरालाई एमालेमा प्रवेश गराउन अध्यक्ष ओली मोरङ पुगेका हुन् ।