काठमाडौं । नेप्से परिसूचक विहीबार दोहोरो अंकले बृद्धि भएको छ । शेयर बजार बुधबार दोहोरो अंकले घटेको थियो ।

विहीबार शेयर बजार नेप्से ४३ अंकले उकालो लागेर २६ सय ९२ पुगेको छ ।

बिहीबार कारोबार भने पछिल्ला दिनका तुलनामा थप खुम्चिएर साढे ३ अर्ब हाराहारीमै सीमित भएको छ ।

निर्जीवन बीमा समूहमा सबैभन्दा उच्च अढाई सय अंक हाराहारीको बृद्धि आयो । जीवन बीमा र होटल तथा पर्यटन समूह पनि सय अंक बढीले उकालो लागे । वाणिज्य बैंक सहित अरु पनि अधिकांश समूह दोहोरो अंकले सुधारिए ।

विहीबार नेपाल स्टक एक्सचेन्जमा २ सय ३८ कम्पनीको ७३ लाख बढी कित्ता शेयर ३ अर्ब ६८ करोड बराबरका किनबेच भएको एक्सचेन्जले जनाएको छ ।

यस दिन १ सय ६४ कम्पनीको शेयर मूल्य बढ्दा २३ को घटेको र ३ को स्थिर रहेको पनि नेप्सेले जनाएको छ । बुधबार ४ अर्ब ६२ करोड १५ लाख ९८ हजार ५८३ रुपैयाँको शेयर कारोबार भएको थियो ।

आज अपी पावर कम्पनी र एनआईसी एशिया बैंकको शेयर दोस्रो बजारमा उच्च मात्रामा कारोबार भएको थियो । दुई कम्पनीको शेयर दोस्रो बजारमा क्रमशः १६ र १४ करोड बढीले कारोबार भएको थियो ।

त्यस्तै, सेन्सेटिभ इण्डेक्स ९.१६ अंक, फ्लोट इण्डेक्स ३.०४ अंक र सेन्सेटिभ इण्डेक्स ३.३१ अंक बढेको छ ।

त्यस्तै, जलविद्युत र निर्जीवन बीमा उपसमूहको परिसूचक २ प्रतिशतभन्दा बढी बढेको छ भने बैंकिङ्ग, विकास बैंक, वित्त, लगानी, लघुवित्त र अन्य उपसमूहको परिसूचक १ प्रतिशतभन्दा बढी बढेको छ। आज व्यापार र उत्पादन तथा प्रशोधन उपसमूहको परिसूचक भने घटेको छ ।

विहिबार तीन कम्पनीको शेयर सकारात्मक सर्किट लेभलमा कारोबार भएको छ ।जसमा नेपाल फाइनान्स, तेह्रथुम पावर कम्पनी र मध्य भोटेकोशी जलविद्युत कम्पनीको शेयरमूल्य सकारात्मक सर्किट लेभलमा कारोबार भएको हो। तर, आज कारोबारमा आएको एनबीबीएल डिबेञ्चरको मूल्य भने ३.५३ प्रतिशत घटेको छ ।

कारोबार रकमका आधारमा १६ करोड ३७ लाख रुपैयाँबराबरको शेयर कारोबार गरेर अपि पावर कम्पनी पहिलो स्थानमा रहेको छ।

त्यस्तै एनआईसी एशिया बैंक र नेशनल माइक्रोफाइनान्सको पनि १० करोडभन्दा बढीको शेयर कारोबार भएको छ ।