कोरोनाको बढ्दो ग्राफः एकैदिन ९६८ जना संक्रमित थपिए

मेरोन्यूज २०७८ पुष २३ गते १६:२६

काठमाडौं । नेपालमा कोरोना संक्रमण दर बढ्दै गएको छ । पछिल्लो २४ घण्टामा मात्रै थप ९६८ जनामा कोरोना सङ्क्रमण पुष्टि भएको छ ।

पछिल्लो २४ घण्टामा १४ हजार ९७१ जनाको परीक्षण गर्दा पीसीआर विधिबाट ५७२ र एन्टिजेन विधिबाट ३९६ जनामा सङ्क्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

सोही अवधिमा थप २६२ जना कोरोना सङ्क्रमणमुक्त भएका छन् । नेपाल हालसम्म कूल सङ्क्रमितमध्ये ८ लाख १३ हजार ७०९ जना सङ्क्रमणमुक्त भइसकेका छन् ।

पछिल्लो २४ घण्टामा काठमाडौं उपत्यकामा विभिन्न प्रयोगशालमा गरिएको परीक्षणमा ३६९ जनामा कोरोना संक्रमण पुष्टि भएको छ ।

शुक्रबार काठमाडौं जिल्लामा २८४ जना, ललितपुर जिल्लामा ६२ जना र भक्तपुर जिल्लामा २३ जनामा कोरोना संक्रमण देखिएको छ ।

हाल देशभर ५ हजार ७४१ जना सक्रिय सङ्क्रमित रहेका छन् ।