काठमाडौं । प्रमुख प्रतिपक्षी दल नेकपा एमाले यतिबेला जिल्ला अधिवेशनको व्यस्ततामा छ । पुस २३ गते भूगोल र गैर भूगोलका गरी ६१ जिल्लाको जिल्ला अधिवेशन एकैपटक अध्यक्ष केपी ओलीले भर्चुअल माध्यमबाट उद्घाटन गरेका थिए । ती जिल्लाका अधिवेशन अहिले नेतृत्व चयनको प्रक्रियामै छ ।

एमालेमा भूगोल र गैर भूगोलका गरी ८८ ओटा जिल्ला कमिटी छन् । जसमध्ये १६ हिमाली जिल्लामा हिमपात र चिसोका कारण अधिवेशन रोकिएको छ । केहीमा जिल्ला नेताको निधनका कारण रोकिएको अवस्था छ ।

तर, ६१ जिल्लामा शुरु भएको अधिवेशन उद्घाटन गर्दै अध्यक्ष ओलीले सकेसम्म सहमतिमा नेतृत्व निर्माण गर्न, कसैलाई पनि मन नखुम्चाई सहमतिमा पुग्न र एउटा टिम स्पिरिटका साथ अगाडि बढ्न आग्रह गरे पनि ओलीले सोचेजस्तो नेतृत्व चयन सर्वसम्मत हुन सकिरहेका छैनन् ।

ओलीले पार्टीविरुद्ध घेराबन्दी हुन थालेको र एकताबद्ध भएर आगामी चुनावमा जानु पर्ने चुनौती पार्टीभित्र रहेको भन्दै सर्वसम्मत नेतृत्व चयनमा जोड गरेका थिए । तर, अहिलेसम्म मेरोन्यूजलाई प्राप्त सूचीअनुसार ३७ जिल्लामा नेतृत्व चयन चुनावबाटै छानिने प्रक्रियामा छ । त्यसका लागि कतिपय जिल्लामा आज मतदानको प्रक्रिया अगाडि बढेको छ । केही जिल्लामा अझै सहमतिको प्रयासका लागि नेताहरुले आकांक्षी नेताहरुसँग सम्वाद गरेर मेहनत गरिरहेको एमालेले जनाएको छ ।

६१ मध्ये २४ जिल्लाको नेतृत्व सर्वसम्मत चयन भएको एमाले केन्द्रीय कार्यालयले जनाएको छ । दुई जिल्ला कपिलवस्तु र पश्चिम नवलपरासीमा भने चुनाव भएर पनि नतिजा आइसकेको छ ।

चुनाव हुने तयारीमा रहेका केही जिल्लामा अझै पनि मिलाउन सकिन्छ कि भनेर सर्वसम्मत प्रयास भइरहेको एमालेको भनाई छ । कतिपय जिल्लामा थप एक दुई दिन प्रक्रिया स्थगित गरेर सहमतिको प्रयास भइरहेको छ । चितवनमा २६ गतेसम्मलाई अधिवेशन स्थगित गरेर सहमतिको प्रयास भइरहेको एमाले नेताहरुले जनाएका छन् ।

कहाँ-कहाँ भए सर्वसम्मत

१) मकवानपुर

अध्यक्षमा एकलाल श्रेष्ठ, उपाध्यक्षमा लालबहादुर थापा, सचिवमा नवीन सिग्देल, उपसचिवमा हिदम लामा र सीता विष्ट सर्वसम्मत चयन ।

२) भक्तपुर

अध्यक्षमा बचन देउजा, उपाध्यक्षमा वासुदेव थापा, सचिवमा मोहनवीर श्रेष्ठ, उपसचिवमा दामोदर दंगाल र मिलन सुवाल चयन ।

३) काभ्रेपलाञ्चोक
अध्यक्षमा अशोक व्यञ्जु, उपसचिवमा रिता ढकाल निर्विरोध चयन । अन्य पदमा चुनाव हुने ।

४) बर्दिया
अध्यक्षमा लालबहादुर श्रेष्ठ, उपाध्यक्षमा शालिकराम अधिकारी, सचिवमा पदम ढकाल तथा उपसचिवमा पहारी थारु र टीका सम्सेली चयन ।

५) झापा
अध्यक्षमा दीपक कार्की, उपाध्यक्षमा प्रेम गिरी, सचिवमा शिव टुंगेल र उपसचिवमा चन्द्रा श्रेष्ठ र अशारु राजबंशी चयन ।

६) नुवाकोट
अध्यक्षमा बद्री मैनाली, उपाध्यक्षमा बुद्धिबहादुर प्रधान, सचिवमा सुदर्शन नेपाल, उपसचिवमा काशिराज अधिकारी र नीलकण्ठ आचार्य चयन ।

७) दाङ
अध्यक्षमा हुकुम बस्नेत, उपाध्यक्षमा राममणि पाण्डे, सचिमा मनोहर बुढाथोकी, उपसचिवमा कृष्ण भुसाल र हिरा देवी पुन चयन ।

८) पाल्पा
अध्यक्षमा धनेन्द्र घिमिरे, उपाध्यक्षमा देवीलाल लामिछाने, सचिव भोजराज पोखरेल, उपसचिव टीका थापा र सुनिता शर्मा चयन ।

९) रसुवा

अध्यक्षमा कर्णेल लामा, उपाध्यक्षमा दिल्ली सुवेदी, सचिवमा जनार्दन ढकाल, उपसचिवमा कैसाङ नुर्पु तामाङ र बेली बुलुन चयन ।

१०) खोटाङ
अध्यक्षमा रामप्रसाद दंगाल, उपाध्यक्षमा देवविक्रम राई, सचिवमा कुमार आचार्य, उपसचिव दीपनारायण रिजाल र सुरेन्द्र राई चयन ।

११) मोरङ
अध्यक्षमा ऋषिकेश पोखरेल चयन ।

१२) धनकुटा
अध्यक्षमा इन्द्रमणि पराजुली चयन ।

१३) सप्तरी
अध्यक्षमा ताराकान्त चौधरी चयन ।

१४) धादिङ
अध्यक्षमा भूमी त्रिपाठी चयन ।

१५) गोरखा
अध्यक्षमा प्रेम गुरुङ चयन ।

१६) तनहु
अध्यक्षमा श्रीप्रसाद श्रेष्ठ चयन ।

१७) गुल्मी
अध्यक्षमा बालकृष्ण काउछा मगर चयन ।

१८) अर्घाखाची
अध्यक्षमा पिताम्बर भुसाल चयन ।

१९) बाँके
अध्यक्षमा किस्मत कुमार कक्षपती चयन ।

२०) रुपन्देही

अध्यक्षमा तेजेन्द्र केसी चयन ।

२१) डोल्पा
अध्यक्षमा शेरबहादुर बुढा चयन ।

२२) सल्यान
अध्यक्षमा गोविन्द पुन मगर चयन ।

२३) मजदूर विशेष गैह भौगोलिक जिल्ला
अध्यक्षमा जितेन्द्र श्रेष्ठ चयन

२४) पेशागत विशेष गैह भौगोलिक जिल्ला
अध्यक्षमा उमेश ढकाल चयन ।

दुई जिल्लामा निर्वाचनपछि नेतृत्व

पश्चिम नवलरासी र कपिलवस्तुमा भने निर्वाचनपछि एमालेले जिल्ला नेतृत्व पाएको छ । सहमति प्रयास असफल भएपछि यी दुई जिल्लामा एमालेले जिल्ला अध्यक्ष, उपाध्यक्ष, सचिव र उपसचिवको चुनाव गराएको थियो ।

पश्चिम नवलपरासीमा अध्यक्षमा दीपेन्द्र अधिकारी निर्वाचित भएका छन् । उनले प्रतिस्पर्धी थानप्रसाद गैरेलाई पराजित गरेका हुन् । उपाध्यक्षमा डोलराज भण्डारी निर्वाचित भएका छन् । उनले प्रतिस्पर्धी लेखनाथ खरेललाई पराजित गरेका हुन् । सचिवमा धिरज शर्मा विजयी भएका छन् । उनले प्रतिस्पर्धी सुभास जिसीलाई पराजित गरेका हुन् । त्यस्तै उपसचिवमा रिङकला यादव र राजन कुमार आचार्य विजयी भएका छन् ।

त्यस्तै, निर्वाचनबाट परिणाम आएको अर्काे जिल्ला कपिलवस्तु हो । कपिलवस्तुको अध्यक्षमा डम्मर शर्मा निर्वाचित भएका छन् । उनले प्रतिस्पर्धी बाबुराम खनाललाई पराजित गरेका हुन् । उपाध्यक्षमा विश्रामप्रसाद थारु निर्वाचित भए । सचिवमा भने विश्व कार्की निर्वाचित भएका छन् । उपसचिवमा अर्जुन केसी र विकास आचार्य विजयी भएका छन् ।

दुई जिल्लामा माओवादी छोडेर एमाले गएकालाई उपसचिव

भक्तपुर र काभ्रेपलाञ्चोक दुई जिल्लामा माओवादी छोडेर एमाले गएका दुई जिल्ला नेताले उपसचिवको जिम्मेवारी पाएका छन् । सर्वसम्मत पदाधिकारी चयन भएका यी दुई जिल्लामा नेकपा विभाजनपछि माओवादी छोडेर एमालेमा पुगेका नेताले उपसचिवको जिम्मेवारी पाएका हुन् ।

काभ्रेमा रिता ढकाल उपसचिव निर्विरोध चयन भइन् । उनी तत्कालीन समयमा माओवादीबाट मण्डनदेउपुर नगरपालिकाको मेयरको उम्मेदवार थिइन् । नेकपा विभाजनपछि उनी माओवादी नफर्केर एमालेमा नै रहेकी थिइन् । त्यस्तै, भक्तपुरमा उपसचिव बनेका मिलन सुवाल पनि पहिले माओवादी थिए । माओवादी केन्द्रबाट प्रदेश सभा चुनावमा उम्मेदवारसमेत बनेका सुवाल पनि नेकपा विभाजनपछि एमालेमै रहे । उनी माओवादी फर्केनन् ।

अहिलेसम्म आएका नतिजाअनुसार माओवादी छोडेर एमालेमा रहेका दुई जनाले जिल्ला उपसचिवको जिम्मेवारी प्राप्त गरेका हुन् ।

०००