काठमाडौँ । करिब ३० लाख मूल्य बराबरको भन्सार छलीका सामान बोकेको ट्रकलाई प्रहरीले नियन्त्रणमा लिएको छ । पर्साको वीरगञ्जबाट प्रहरीले ट्रकलाई नियन्त्रणमा लिएर आवश्यक कारबाहीका लागि राजश्व अनुसन्धान कार्यालय पथलैया पठाएको हो ।

जिल्ला प्रहरी कार्यालयका अनुसार वीरगञ्ज महानगरपालिका १६ इदगाह चोकको सडक खण्डमा ना ३ ख ५६७१ नंको मालवाहक ट्रकलाई प्रहरी टोलीले नियन्त्रणमा लिएको थियो ।

उक्त ट्रकमा भन्सार छली गरी ल्याइएका खुद्रा सामान फेला परेको प्रहरीको दाबी छ । सोही क्रममा ट्रकका चालक पर्साको जगरनाथपुर गाउँपालिका १ का ४५ वर्षीय लालबाबु महरालाई नियन्त्रणमा लिइएको प्रहरीले जनाएको छ ।

उक्त ट्रकमा भएको मालसमानसहित ३० लाख मूल्यांकन गरी आवश्यक कारबाहीका लागि राजश्व अनुसन्धान कार्यालय पथलैया, बारामा बुझाइएको प्रहरीले जनाएको छ ।