ताप्लेजुङ । ताप्लेजुङमा तेस्रो पटक विहीबार रातीदेखि हिमपात भएको छ । प्रसिद्ध धार्मिकस्थल पाथीभरा मन्दिर क्षेत्रमा भारी हिमपात भएको हो ।

हिमपातले बाटो छोपिएपछि तीर्थयात्रीलाई मन्दिरसम्म पुग्न समस्या भएको पाथीभरा क्षेत्र विकास समितिका कर्मचारी राजेन्द्र महतले जानकारी दिए ।

पाथीभरामा जानुभन्दा पनि फर्किदा ओरालो पर्ने भएकाले समस्या हुने गरेको महतले बताए ।

पाथीभरा क्षेत्रमा बिहीबार रातिदेखि नै हिमपात हुन सुरु भएको हो । सोदिन ६० तीर्थयात्रीले पाथीभरा मन्दिरमा पुगेर पूजापाठ गरेको क्षेत्र विकास समितिले जनाएको छ ।

यस्तै, फक्ताङलुङ गाउँपालिका–७ याङमा क्षेत्रमा पनि हिमपात भएको छ ।

हिमपातका कारणले अत्यधिक चिसो बढेकाले बढी बालबालिका र ज्येष्ठ नागरिक प्रभावित भएको स्थानीयले बताएका छन् ।

यसैगरी मिक्वाखोला गाउँपालिका–६ तोक्पेगोला र पापुङ बस्तीमा पनि हिमपात भएको छ ।

ताप्लेजुङमा गत पुस १३ र १४ गते यो वर्षको पहिलो पटक हिमपात भएको थियो भने पुस २९ मा दोस्रो पटक हिमपात भएको थियो ।