काठमाडौं । साङ्ग्रिला डेभलपमेण्ट बैंकका म्यानेजर ठगी मुद्दामा समातिएका छन् ।

जिल्ला प्रहरी कार्यालय दाङले अनुसन्धानका क्रममा घोराहीको मनटावरमा रहेको साङ्ग्रिला डेभलपमेण्ट बैंकका म्यानेजर सुदर्शन विष्टलाई पक्राउ गरेको हो ।

५० लाख ठगीमा पक्राउ परेका दाङ घोराहीका विकास पुनको मुद्दामा विष्ट पक्राउ परेका हुन् ।

जिल्ला प्रहरी कार्यालय दाङबाट खटिएको प्रहरी टोलीले शाखा कार्यालयबाटै म्यानेजर विष्टलाई पक्राउ गरेको हो ।

ठगी मुद्दामा समातिएका पुनको पैसा आदानप्रदान गर्ने कार्यमा विष्टले सघाउ पु¥याएको अनुसन्धानको क्रममा देखिएकाले उनलाई पक्राउ गरेको जिल्ला प्रहरी कार्यालय दाङका एसपी सुरेशप्रसाद काफ्लेले जानकारी दिए ।

काठमाडौंको सुनधारा क्षेत्रबाट पक्राउ परेका पुनलाई उनकै गाडीमा प्रहरीले जिल्ला पुर्याएको थियो ।

कपिलवस्तु जिल्लाको बाणगंगा ४ का तिलक थापाले दिएको ठगी मुद्दाको जाहेरीका आधारमा प्रहरीको केन्द्रीय अनुसन्धान ब्यूरोले पुनलाई काठमाडौँमा पक्राउ गरेको थियो ।